बागमती प्रदेशय् नेवाः व तामाङ भाषा कार्यान्वयन याना यंकेत सुझाव तयार
येँ (नेपालभाषा टाइम्स)÷बागमती प्रदेश सरकारं पारित याःगु भाषा सम्बन्धी कानुन कार्यान्वयन याना यंकेत छु छु ज्या याना वने माली धकाः रोडम्याप दयेकेत गठन याःगु कार्यदलं थःगु ज्या अन्तिम चरणय् थ्यंकूगु दु । कार्यदलयात प्रदेश सरकारं थ्वहे असार मसान्त तकया कार्यावधि बियातःगु खःसा कार्यदलं असार दुने हे थःपिनि प्रतिवेदन लःल्हायेगु तयारी यानाच्वंगु खँ सीदुगु दु ।
कार्यदलय् बागमती प्रदेशया मुख्यमन्त्री सचिवालय लिसें संस्कृति मन्त्रालयया थीथी विभागय् ज्या याइपिं प्यम्ह सचिव लिसें नेवाः देय् दबू व तामाङ घेदुङया नायः लिसें भाषा आयोगया प्रतिनिधि दुजः कथं तयातःगु दु ।
कार्यदलया दुजः लिसें नेवाः देय् दबूया नायः पवित्र वज्राचार्यं कनादीकथं कार्यदलया ज्या अन्तिम चरणय् थ्यनाच्वंगु दु । कार्यदलं भाषा कानुन कार्यान्वयन सम्बन्धी तत्कालीन व दीर्घकालीन योजनात प्रस्तावित याःगु दु । दीर्घकालीन योजना छुं ई लिपा कार्यान्वयन याःसां कानुनयात तत्काल लागू यायेगु लागिं आवश्यक जुइपिं कर्मचारी संख्या, कर्मचारी भर्ना प्रक्रिया, बजेट आदि सम्बन्धी खँ कार्यदलया प्रतिवेदनय् दुथ्यानाच्वंगु खँ नं वय्कलं कनादिल ।
बागमती प्रदेशं नेपालभाषा व तामाङ भाषायात सरकारी ज्याखँया भाषा दयेकेगु कथं कानुन पारित याःगु खः । उकिं थुकिया लागिं नेवाः देय् दबू, तामाङ घेदुङ व भाषा आयोग लिसें मन्त्रालयया सचिवतय्सं मेहनत यानाः ज्या यानाच्वंगु खँ नं वय्कलं कनादिल । कार्यदलया ज्यायात न्ह्यःने न्ह्याकेत नेवाः देय् दबूपाखें उमेश स्थापित व तामाङ घेदुङपाखें जगत दोंगपिंसं नं नियमित रुपं ग्वाहालि यानाच्वंगु दु । कार्यदलपाखें आः तक यानाच्वंगु ज्याखँ बारे जानकारी बीत नेवाः देय् दबूपाखें छुं न्हि न्ह्यः नेवाः खलः पुचःया प्रतिनिधिपिनि दथुइ ब्रिफिङ नं याःगु खः ।
कार्यदलं तयार याःगु प्रतिवेदन सरकारयात लःल्हायेवं सरकारपाखें वहे कथं ज्या न्ह्याकी धाःगु दु ।
प्रदेश सरकारपाखें माक्व बजेट
बागमती प्रदेशय् नेपालभाषा व तामाङ भाषायात सरकारी ज्याखँया भाय् कथं लागू याना यंकेगु लागिं प्रदेश सरकारपाखें उकुन्हु पारित याःगु बजेटय् माक्व ध्यबा व्यवस्था याःगु दु । बागमती प्रदेशया संस्कृति मन्त्री शैलेन्द्र वज्राचार्यं थ्व ज्याया लागिं सरकार स्वयम् लिसें नेवाः देय् दबू व तामाङ घेदुङपाखें समेत खर्च याये जी कथं बजेटया व्यवस्था याःगु खः । थ्व सम्बन्धी ज्याखँ न्ह्याकेत नेवाः देय् दबूयात १ करोड २० लाख व तामाङ घेदुङयात १ करोड २० लाख तका दां फ्यानातःगु दु ।
अथे हे थीथी मन्त्रालयपाखें नं भाषाया लागिं ज्या यायेत दां फ्याःगु दु । फुक्कं यायेबलय् थ्व दँय् भाषाया ज्या यायेगु लागिं जक करिब ४ करोड दांया बजेट व्यवस्था याःगु खँ सीदुगु दु ।
LEAVE YOUR COMMENTS