प्रज्ञाय् निक्वःगु मातृभाषा साहित्य श्रृंखला

येँ(नेपालभाषा टाइम्स)- नेपाल प्रज्ञा प्रतिष्ठानय् निक्वःगु मातृभाषा साहित्य श्रृंखला जुल । प्रतिष्ठानया मातृभाषा विभागया ग्वसालय् उगु ज्याझ्वः जूगु खः । नेपाल प्रज्ञा प्रतिष्ठानया कुलपति भूपाल राईया प्रमुख आतिथ्यताय् सुनुवार व किरात कोइच भाषाया विषयय् नं सहलह जूगु खः ।

निक्वःगु मातृभाषा साहित्य श्रृंखला नापं निगू भाषाया विषयय् जूगु सहलह गोष्ठिइ सुनुवार कोइच भाषाया विद्वान डा. लाल रापचा व उत्तम कातिचां उगु भाषाया थीथी पक्षयात कयाः ज्यापौ न्ह्यब्वयादीगु खः ।

ज्याझ्वलय् सहभागितय्सं ज्यापौयात कयाः थीथी न्ह्यसः व जिज्ञासा तयादीगु खःसा ज्यापौ न्ह्याब्वयादीपिं विद्वानवर्गं उकियात कयाः लिसः नं बियादीगु खः । सुनुवार भाषायात कयाः जूगु सहलहया इलय् उगु भाषाया सौन्र्दययात कयाः व्यापक सहलह जूगु खः ।

ज्याझ्वलय् मूपाहां प्रतिष्ठानया कुलपति राईं भाषाया मूल्य मान्यता व महत्वयात कायः ध्वाथुइकादिसें मातृभाषां म्हगस खंकेगु संस्कारया विकास यायेमाःगु खँय् बः बियादिल ।

मातृभाषा विभागया प्रमुख प्रा. राजन मुकारुंगया सभापतित्वय् जूगु ज्याझ्वलय् जेरुंग राई भाषाया नैन सेपाल चु, थामी भाय्या रमेश थामी व सुनुवार भाय्या टंक सुनुवारं थःथःगु मातृभाषां चिनाखँ ब्वनाः न्यंकादीगु खः ।