पूर्णिमा श्रेष्ठपाखें छगू हे सिजनय् स्वक्वः सगरमाथा आरोहण

येँ (नेपालभाषा टाइम्स)- सगरमाथा आरोही फोटो पत्रकार पूर्णिमा श्रेष्ठं सगरमाथा आरोहणय् न्हूगु कीर्तिमान तःगु दु । आरोही श्रेष्ठं छगू हे सिजनय् स्वक्वः तक सर्वोच्च शिखर सगरमाथा सफलतापूर्वक गयाः न्हूगु विश्व कीर्तिमान तःगु खः ।

श्रेष्ठ शनिवाः सुथय् थुगुसीया बसन्तया सिजनय् स्वक्वःगुखुसी सगरमाथाया च्वकाये थ्यंकःवंगु खः । पर्यटन विभागया साहसिक पर्यटन तथा पर्वतारोहण शाखाया निर्देशक राकेश गुरुङं शनिवाः सुथय् ५ः५० बजे श्रेष्ठ स्वक्वःखुसी सगरमाथाया च्वकायेथ्यंगु खँ धाःगु दु । थुगुसीया स्वक्वःसहित यानाः श्रेष्ठं प्यक्वः सगरमाथा गयेधुंकूगु दु ।

थ्व सिजनय् श्रेष्ठं दकलय् न्हापां मे १२ तारिखय् सगरमाथा च्वकाये थ्यंकःवंगु खःसा थ्व लिपा मे १९ तारिखय् सगरमाथाय् च्वकाय् थ्य.कःवंगु खः । गोरखा आरुघाट गाउँपालिका–१० या मय्जु श्रेष्ठं सन् २०१८ य् न्हापांखुसी सगरमाथा गःगु खः । वय्कः सगरमाथा गयेत ताःलाःम्ह स्वम्ह नेवाः मिसा नं खः ।

८ हजार मिटर स्वयां तजाःगु झिंप्यंगू हिमाल आरोहण अभियानय् दुथ्याःम्ह श्रेष्ठं वंगु साउन महिनाय् पाकिस्तानय् च्वंगु विश्वया निगूगु दकलय् तजाःगु हिमाल के–टुया सफल आरोहण याःगु खः ।