भृगुराम श्रेष्ठ व योगेश वैद्यया मंकाः बिचाः मुँज्या
येँ (नेपालभाषा टाइम्स)÷ सदावहार गायक योगेश वैद्य मदुगु इलय् वय्कःयात राज्यपाखें बीमाःगु राष्ट्रिय सम्मान प्रदान मयाःगु खेदजनक खँ खः धाःगु दु । वंगु शनिवाः जनगायक भृगुराम श्रेष्ठ व सदावहार गायक योगेश वैद्यपिनि लुमंतिइ जूगु मंकाः बिचाः मुँज्याय् न्ववासें नेवाः न्ह्यलुवा मल्ल के. सुन्दरं उगु खँ धयादीगु खः ।
वैद्य मदुकुन्हु वय्कःया सीम्हय् फायेकेगु धकाः राष्ट्रिय ध्वाँय् हयातःगु खःसां संघीय सरकारया सुं हे प्रतिनिधि मवसेंलि यल महानगरपालिकाया मेयर चिरिबाबु महर्जनं राष्ट्रिय ध्वाँय् फायेकादीगु खँ वय्कलं कनादिल ।
अथे हे जनगायक भृगुराम श्रेष्ठं नेवाः संगीत जक मखु नेवाः आन्दोलनयात हे च्वन्ह्याकेगु लागिं गायनया माध्यमं तःजिगु योगदान बियादीगु खँ लुमंकुसें वय्कःया निधन नेवाः ख्यःया लागिं तःधंगु क्षति खः धयादिल ।
ज्याझ्वलय् भृगुराम श्रेष्ठया बारे न्ववासें वय्कःया त्वाःबहाःया साहित्यकार आर.के. निर्मलं नेपालभाषाया दबू प्याखनय् नं श्रेष्ठया विशेष योगदान दुगु खँ कुलादिल ।
उगु ज्याझ्वलय् मदुपिं गायक श्रेष्ठ व वैद्यया बारे नेवाः देय् दबूया नायः पवित्र वज्राचार्य, न्हूदँ समारोह समितिया नायः प्रा.डा. नरेशमान वज्राचार्यपिंसं नं न्ववानादीगु खःसा गायकपिं पवित्र कसाः व रीता महर्जनं वय्कःपिनि म्ये हालादीगु खः । अथे हे लोककवि राजभाइ जकःमिं थःगु कविता पाठ यानादीगु खःसा जनकवि दुर्गालाल श्रेष्ठं च्वयादीगु कविता सुरेश किरणं वाचन यानादीगु खः ।
भृगुराम व योगेश निम्हंलिसे क्वातुक स्वापू दुम्ह जनकवि श्रेष्ठ उसाँय्या कारणं ज्याझ्वलय् थ्यंकादी मफुगु खः ।
नेपालभाषा एकेडेमिया चान्सलर यज्ञरत्न धाख्वाया सभापतित्वय् उमेश स्थापितं न्ह्याकादीगु उगु ज्याझ्वः एकेडेमि लिसें नेवाः देय् दबू, नेपालभाषा मंकाः खलः व नेपाल संवत् राष्ट्रिय न्हूदँ समारोह समितिया मंकाः ग्वसालय् जूगु खः । उगु हे ज्याझ्वलय् मदुपिं निम्हं गायकपिनि रंगीन किपा नं सार्वजनिक याःगु खः ।
LEAVE YOUR COMMENTS