स्वन्ति लिपा मन्त्रिमण्डल पुनर्गठन

आः प्वनाच्वंगु मन्त्रालययात जक पूर्णता बीगु तयारी

येँ (नेपालभाषा टाइम्स) – मन्त्रिपरिपद् पुनर्गठन आःयात मजुइगु जूगु दु। नेकपाया निम्ह अध्यक्षपिं प्रधानमन्त्री केपी शर्मा ओली व मेम्ह अध्यक्ष पुष्पकमल दाहाल दथुइ खँ मिले मजुइवं तत्काल मन्त्रिपरिषद पुनर्गठन मजुइगु खँ सीदुगु दु ।

सूत्रया कथं वइगु स्वन्ति नखः लिपा जक मन्त्रिपरिषद पुनर्गठन जुइगु जूगु दु। राष्ट्रिय सभाय् मनोनित जूम्ह वामदेव गौतम विरुद्ध मुद्दा लायेवं मन्त्रिपरिषद पुनर्गठनया यायेगु ज्या लिज्याःगु खँ नेकपाया छम्ह नेतां धाःगु दु। उम्ह नेताया कथं आः मन्त्रिमण्डल पुनर्गठन यायेगु इलय् वामदेव गौतमयात नं मन्त्री दयेकेगु कथं तयारी जुयाच्वंगु खःसा गौतम विरुद्ध मुद्दा सर्वोच्च अदालतय् ‘हेर्दा हेर्दै’ अवस्थाय् लायेवं प्रम ओली गौतमया मुद्दा क्वमचाःतले मन्त्रिमण्डल पुनर्गठन यायेगु मनस्थिति मदुगु खँ धाःगु दु ।

प्रधानमन्त्री ओलीं थःगु पक्षया मन्त्रीतय्त निरन्तरता बियाः मेपिं मन्त्रीपिंत जक हिलेगु मनसाय क्यंगुलिं तत्काल मन्त्रिपरिषद पुनर्गठन जुइ मफइगु खँ सूत्रं धाःगु दु। सूत्रया कथं प्रम ओली मन्त्रिपरिषदय् थः पक्षया मन्त्रीयात निरन्तरता बीमाःगु अडान कयाच्वंगु दुसा मेम्ह अध्यक्ष दाहालं पूवंकं हे मन्त्रिपरिषदय् न्हूपिं हयेमाःगु अडान कयाच्वंगु दु ।

थ्वहे झ्वलय् सीदु कथं प्रम ओलीं आः प्वनाच्वंगु मन्त्रालययात पूर्णता बीगु तयारी नं यानाच्वंगु दु। वइगु छन्हु निन्हुया दुने प्वनाच्वंगु मन्त्रालय मन्त्री नियुक्ति यायेगु कथं तयारी यानाच्वंगु खँ सूत्रं धाःगु दु। थौंकन्हय् अर्थ , सञ्चार तथा सूचना प्रविधि व शहरी विकास मन्त्रालय मन्त्री विहिन जुयाच्वंगु दु। प्रम ओली स्वंगू मन्त्रालय मध्ये निगू मन्त्रालयसं थः पक्षय् दुपिं नेकपाया महासचिव विष्णु पौडेलयात अर्थ मन्त्री दयेकेगु कथं तयारी यानाच्वंगु दु। उकथं हे कृष्णगोपाल श्रेष्ठयात शहरी विकास मन्त्रालया बीगु तयारी यानाच्वंगु दु। थ्व स्वयां न्ह्यः पुलांम्ह अर्थमन्त्री सुरेन्द्र पाण्डेयात शहरी विकास मन्त्रालय बीगु तयारी प्रम ओलीं याःगु खःसां नं पाण्डे अर्थ मन्त्रालय बाहेक थम्हं मेगु मन्त्रालय मकायेगु खँ धायेवं पौडेलयात अर्थमन्त्री दयेकेगु तयारी प्रम ओली याःगु खः । थ्व स्वयां न्ह्यः वामदेव गौतमयात अर्थ मन्त्री दयेकेगु तयारी प्रम ओली याःगु खः ।

थौंकन्हय् अर्थ, सञ्चार तथा सूचना प्रविधि व शहरी विकास मन्त्रालय प्रम ओलीं थःगु मातहतय् तयातःगु दु। वंगु भदौ २६ गते च्वंगु स्थायी कमिटी बैठक व असोज ४ गते च्वंगु सचिवालयया बैठकया म्याण्डेट कथं प्रम ओली व दाहाल दथुइ मन्त्रिपरिषद पुनर्गठनया निंतिं निरन्तर सहलह जुयाच्वंसां नं उकिया लिच्वः धाःसा पिकाये मफयाच्वंगु खः ।

थ्वहे दथुइ गुगु मन्त्रालय सुयात बीगु धइगु बारे नं निम्ह अध्यक्षया दथुइ विवाद ब्वलनाच्वंगु खँ सीदुगु दु। अध्यक्ष दाहालं सञ्चार मन्त्रालय पूर्व माओवादीयात बीमाःगु अडान कयाच्वंगु दुसा मेम्ह अध्यक्ष लिसे प्रम ओली सञ्चार मन्त्रालय पूर्व माओवादीयात बीगु पक्षय् मदु। नेकपाया छम्ह नेताया कथं पुलांगु पार्टीया हे खँ ल्हायेगु खःसा अर्थ व सञ्चार मन्त्रालय पुलांगु एमालेया भागय् लाःगु खःसा शहरी विकास मन्त्रालय समाजवादी पार्टीयात बिउगु खः ।