टि–२० क्रिकेटय् नेपाःया खुगू विश्व कीर्तिमान
एजेन्सी- झिंगुक्वःगु एसियाली खेलकूद अन्र्तगत जूगु टी–२० क्रिकेटया थःगु न्हापांगु कासाय् नेपालं मंगोलियायात बुकूगु दु । मंगोलियायात बुकेगु झ्वलय् नेपालं तःगू विश्व कीर्तिमान नं दयेकूगु दु । थ्व कासाय् नेपालं छगू मखु गुंगू थीथी कीर्तिमान दयेकूगु खः । थ्व झ्वलय् नेपाःया कासामितय्सं व्यक्तिगत रुपं थीथी कीर्तिमान नं तःगु खः । कासाय् नेपालं बिउगु ३१५ रनया तःधंगु लक्ष्य ज्वनाः मैदानय् वःगु मंगोलिया मुक्कं ४१ रन दयेकाः अलआउट जूगु खः ।
कासाय् टस बुनाः न्हापां ब्याटिङ याःगु नेपालं निर्धारित २० ओभरय् स्वंगू विकेटया क्षतिइ ३१४ रन दयेकूगु खः । नेपाःया निंतिं कुशल मल्ल दकलय् अप्वः नटआउट १३७ रन दयेकूगु खःसा दीपेन्द्र सिंह ऐरी नटआउट ५२ व कप्तान रोहित पौडेल ६१ रन दयेकूगु खः । अथेहे कुशल भुर्तेलं १९ व आसिफ शेखं १६ रन दयेकूगु खः । कासाय् मंगोलियाया दावासुरेन छम्हेसिनं १० रन दयेकूगु बाहेक मेपिं सुं नं कासामितय्सं निगू ल्याःया रन दयेमफुत ।
नेपाःया निंतिं करन केसी, अभिनाष बोहरा व सन्दीप लामिछानें निगू निगू विकेट काःगु खःसा सोमपाल कामी, दिपेन्द्र सिंह ऐरी व कुशल भुर्तेलं छगू छगू विकेट काःगु खः ।
थ्व कासाय् नेपालं निर्धारित २० ओभरय् स्वंगू विकेटया क्षतिइ दयेकूगु ३१४ रन विश्व कीर्तिमान रन खः । टि–२०या अन्तर्राष्ट्रिय क्रिकेटय् छुं नं टिमं दयेकूगु थ्व आःतकया हे उच्च स्कोर खः । थ्व झ्वलय् नेपालं आःतकया दकलय् अप्वः रन रेटया रेकर्ड नं दयेकल । कासाय् नेपाःया रन रेट १५.७ खः । नेपालं मंगोलियायात टि–२० या इतिहासय् दकलय् तःधंगु अन्तरं बुकाः मेगु विश्व कीर्तिमान नं दयेकूगु खः । नेपालं मंगोलियायातयात २७३ रनं बुकूगु खः ।
कासाय् नेपाःया ब्याट्म्यानतय्सं टि–२०इ दकलय् अप्वः छक्का प्रहार याःगु न्हूगु कीर्तिमान नं दयेकूगु खः । नेपाःया कासामितय्सं थ्व कासाय् मुक्कं २६ गू छक्का प्रहार याःगु खः ।
अथेहे कुशल मल्ल व दिपेन्द्र सिंह ऐरी नं थःपिनिगु व्यक्तिगत कीर्तिमान दयेकल । कुशल मल्ल दकलय् याकनं शतक थ्वाःगु विश्व कीर्तिमान दयेकूगु खः । कुशलं ३४ बलय् शतक प्रहार याःगु खः । कुशलं भारतया रोहित शर्मा, दक्षिण अफ्रिकाया डेविड मिलर व चेक रिपब्लिकया सुदेश विक्रमं ३५ बलय् शतक दयेकातःगु रेर्कडयात त्वाःथःगु खः । थ्व रेकर्ड छुं नं विधाया क्रिकेटय् दकलय् याकनं थ्वाःगु शतकया रकेर्ड खः । कुशलं ५० बलय् नटआउट १३७ रन दयेकूगु खः । थ्व झ्वलय् वं १२ छक्का व च्यागू चौका प्रहार याःगु खः ।
अथेहे ऐरीं टी–२० क्रिकेटय् दकलय् याकनं अर्धशतक दयेकूगु रेर्कड तःगु खः । ऐरीं भारतया युवराज सिंह १२ बलय् अर्धशतक दयेकूगु रेर्कडयात त्वाःथलाल् मुक्क १० बलय् अर्धशतक दयेकूगु खः । ऐरीं १० बलय् च्यागू छक्का प्रहार याःगु खः । छगू ओभरया खुगू बलय् खुगू हे छक्का प्रहार याःम्ह ऐरी न्हापांम्ह नेपाःया कासामि नं जूगु दु । अथेहे नेपाःया निंतिं दकलय् अप्व अर्धशतक प्रहार याःम्ह कासामि नं जूगु दु । नेपालं पुचःया मेगु कासा माल्दिभ्सलिसे आइतवाः म्हिती । पुचः विजेता क्वाटरफाइनलय् म्हितीगु जुइ । कासा त्याःगु नेपाः क्वार्टरफाइनलय् थ्यनीगु निश्चित दु । क्वार्टरफाइनलय् नेपालं भारत, पाकिस्तान, श्रीलंका, बंगलादेश वा अफगानिस्तान मध्ये छगू देय्लिसे म्हितीगु जुइ ।
LEAVE YOUR COMMENTS