कांग्रेसया थारू नेता–कार्यकर्ताया ख्याच्वः

येँ- नेपाली कांग्रेसया नेता लिसें पुलांम्ह उपप्रधान–मन्त्री विजय गच्छदारयात ललिता निवास प्रकरणय् दोषी ठहर यासें अख्तियारं मुद्दा दायर याःगु खँयात कयाः कांग्रेस समर्थित थारू नेता व कार्यकर्तातय्सं थःपिनि सरोकार क्यंगु दु । देय्न्यंकं च्वंपिं कांग्रेसया थारू नेता व कार्यकर्तातय्सं नेपालगञ्जय् छगू भेला यासें भविष्यय् प्रधानमन्त्री जुइगु सम्भावना दुम्ह छम्हयां छम्ह जक थारू नेतायात प्रधानमन्त्री जुइगु लँपुपाखें पनेगु लागिं हे राज्यं थ्व षडयन्त्र यानाः फँसे याःगु धकाः द्वपं बिउगु दु । उमिसं थःपिनि भेला लिपा छगू पत्रकार सम्मेलन हे यासें न्ववाःगु खः ।

थ्व थारू नेता–कार्यकर्तातय्सं ११ बुँदाया छगू निष्कर्ष पिकासें छगू हे मुद्दाय् पुलांपिं प्रधानमन्त्री डा. बाबुराम भट्टराई, माधव नेपाल लगायत नेकपाया महासचिव बिष्णु पौडेलयात निर्दोष खंकाः गच्छदारयात जक दोषी खंकेगु पाय्छि मजू धासें यदि मेपिं निर्दोष खःसा गच्छदार नं निर्दोष जुइगु जिकिर याःगु दु ।

गच्छदारयात कारवाही यानाः कुना बिल धाःसा मेगु पीदँ न्यय्दँ तकं मेपिं थारूतय्सं प्रधानमन्त्रीया दावी याये मफयेमा धकाः थज्याःगु षडयन्त्र याःगु द्वपं नं उमिसं बिउगु दु । यदि थारू नेतातय्त थज्याःगु हे व्यवहार यात धाःसा थःपिं आन्दोलनय् कुहां वये मालीगु ख्याच्वः नं उमिसं बिउगु दु ।

भेलाय् रामजनम चौधरी, गोपाल दहित, डिल्लीबहादुर चौधरी, जनक राम चौधरी, योगन्द्र चौधरी आदिपिनि उपस्थिति दुगु खः । कांग्रेस समर्थित थारू नेतातय्सं समाजवादी पार्टीया थारू सांसद रेशम चौधरीयात कुनातःगु लिसें लक्ष्मण थारू लगायतयात मुद्दा तयातःगु बारे धाःसा छुं न्वमवाः ।