आः नेपालभाषाया फुक्कं सफू ई–लाइब्रेरीइ स्वये फइ

येँ (नेपालभाषा टाइम्स)÷नेपालभाषां आः तक पिहां वयेधुंकूगु फुक्क धइथें सफू आः छेँय् हे च्वनाः अनलाइनपाखें स्वये फइगु जूगु दु । नेपालभाषा केन्द्रीय विभाग, पाटन क्याम्पसं शुरु यायेत्यंगु ई–लाइब्रेरी मार्फत आः सकस्यां नेपालभाषाया सफुलिइ थःगु पहुँच दयेके फइ ।

कन्हय् विहीवाः सुथय् छगू ज्याझ्वःया दथुइ येँ मनपाया उपमेयर सुनिता डंगोलं थुकिया उलेज्या यानादीगु ग्वसाः दु । थुगु ई–लाइब्रेरी सञ्चालन यायेगु लागिं पुलांम्ह मेयर विद्यासुन्दर शाक्यया पालय् येँ महानगरपालिकां ५० लाख तका दां उपलब्ध याकूगु खः ।

केन्द्रीय विभागया प्रमुख उप प्रा.डा. राजनलाल जोशीं कनादीकथं थ्व ई–लाइब्रेरी निःशुल्क जुइ । थुकी संसारया न्ह्याम्ह मनुखं नं पहुँच दयेके फइ । थुकी दकलय् अप्वः नेपालभाषाया सफू दुसा खस नेपाली व छुं भचा अंग्रेजी व हिन्दी भाय्या सफू नं दइ । केन्द्रीय विभागपाखें थुकी तयेगु लागिं ७० हजार गू सफू स्क्यानिङ यायेधुंकूगु दु । थ्व ल्याः अप्वयेकाः छगू लाख तक थ्यंकीगु लक्ष्य दु ।

वय्कलं कनादीकथं थुकी साहित्य, संस्कृति, इतिहास, भाषा आदि विषयया सपूmत यक्व दुथ्याः । कन्हय् थुकिया उलेज्या जूसां ई–लाइब्रेरीइ सफू अपलोड जुइगु क्रम धाःसा न्ह्यानां तुं च्वनीगु खँ नं वय्कलं कनादिल ।

न्ह्याम्हेस्यां स्वये फइगु साइट जूगुलिं थ्व नेपाःया हे न्हापांगु व थुगु प्रकृतिया छगूयां छगू जक सफूकुथि जुइ फइगु खँ नं धाःगु दु । थुकी सफूया नापनापं नेपालभाषा केन्द्रीय विभागय् च्वंगु थेसिसत नं स्वये फइ । थुकी सफूया नां, च्वमिया नां पाखें सफू मालेगु जक मखु शब्द मार्फत पेज नम्बर समेत स्वये फइगु व्यवस्था नं याःगु दु ।

सम्बन्धित बुखँ

LEAVE YOUR COMMENTS