राससया अवधी भाषां समाचार

येँ (नेपालभाषा टाइम्स)- राष्ट्रिय समाचार समिति (राससं) समाचार सामग्रीया समावेशीकरण विविधीकरण यासें म्हिगःनिसें अवधि भाषाया समाचार शुरु याःगु दु । राससया केन्द्रीय ज्याकुथिइ सञ्चार तथा सूचना प्रविधि मन्त्री रेखा शर्मां उगु सेवा न्ह्याकादीगु खः ।

राससया कार्यकारी अध्यक्ष धर्मेन्द्र झां ज्याझ्वलय् न्ववायेगु झ्वलय् स्वंगू तहया सरकारया अनुदान व सहकार्यं भविष्यय् मेमेगु राष्ट्रिय भाषाया समाचार सम्प्रेषण नं यायेगु खँ कनादिल । उकथं हे राससया महाप्रबन्धक सिद्धराज राईं नेपालगञ्ज उपमहानगरपालिकाया सहकार्यय् अवधि भाषाया समाचार सेवा शुरु यानागु जानकारी बियादिल । वय्कलं मातृभाषाया समाचार सम्प्रेषण यानाः राससं राज्यया समावेशी नीतियात प्रवद्र्धन यानागु खँ नं धयादीगु दु ।

महाप्रबन्धक राईया कथं मातृभाषा समाचार सेवा न्ह्याकेत संघीय, प्रदेश व स्थानीय सरकार लिसें सहलह यानाः ज्याझ्वः न्ह्याकागु जानकारी नं बियादीगु दु ।
थ्व स्वयां न्ह्यः राससं खस भाषा व अंग्रेजी भाषाय् जक समाचार सम्प्रेषण याना वयाच्वंगु खः । लिसें वय्कलं मातृभाषाया संवद्र्धन, संरक्षण व विकासय् राससया उगु सेवां महत्वपूर्ण भूमिका म्हितीगु खँ नं धयादीगु दु ।