मन्त्री श्रेष्ठपाखें पत्रकार दबूयात आर्थिक ग्वाहालि
येँ(नेपालभाषा टाइम्स)÷शिक्षा, विज्ञान व प्रविधिमन्त्री कृष्णगोपाल श्रेष्ठं नेवाः पत्रकार राष्ट्रिय दबूयात छगू लख तका आर्थिक ग्वाहालि यानादीगु दु । मन्त्री श्रेष्ठं पत्रकार दबूपाखें छुं दिं न्ह्यः नीस्वंगु कोरोना द्रुत प्रतिकार्य कोषया निंतिं उगु आर्थिक ग्वाहालि लःल्हानादीगु खः ।
मन्त्री श्रेष्ठं मन्त्री निवासय् कोषया संयोजक सुरेन्द्रभक्त श्रेष्ठयात आर्थिक ग्वाहालि लःल्हानादिसें पत्रकारितापाखें भाषा, कला, संस्कृतिया उत्थान, प्रवद्र्धनलिसें समुदायया अधिकारया निंतिं दबुलिं याना वयाच्वंगु ज्यायात कयाः च्वछायादीगु खः ।
येँ महानगरपालिकां नेपालभाषाया माध्यमं शिक्षा बीगु ज्या न्ह्याकूगु तसकं सकारात्मक जू धासें आः स्वनिगःया मेमेगु स्थानीय निकाय व मेमेगु भाषाभाषी व जातजातिया बाहुल्यता दुगु थासय् नं उकथं हे स्थानीय भासं शिक्ष बिया वनेमाः धइगु पक्षय् थः दुगु नं मन्त्री श्रेष्ठं कनादिल ।
दबूया नायः सुरजवीर वज्राचार्यं नेपाली संचारलिसें सरकारी संचारमाध्यमयात नं समावेशी यायेगु निंतिं पत्रकार दबुलिं अभियान न्ह्याकाच्वनागु जानकारी बियादीगु खः ।
कोषया संयोजक श्रेष्ठं कोरोना संक्रमण व निषेधाज्ञाया इलय् समस्याय् लाःपिं बेरोजगार जुयाच्वनेमाःपिं नेवाः पत्रकारतय्त ग्वाहालि यायेगु ल्याखं कोष नीस्वनागु व आतकया दुने स्वंगू लख मुने धुंकूगु जानकारी बियादीगु खः ।
LEAVE YOUR COMMENTS