नवदुर्गा थिमिं लिहां बिज्यात

थिमि (रासस)- ख्वपया नांजाःगु नवदुर्गा प्याखं छवाः तक थिमिया थीथी त्वालय् प्याखं ल्हुकेधुंकाः ख्वपय् लिहांबिज्याःगु दु । थिमिइ वंगु पुस ११ निसें सुरु जूगु नवदुर्गा प्याखं सोमवाः थिमिया मरुत्वाः व बालकुमारी न्ह्यःने प्याखं ल्हुयाः थिमिया यात्रा क्वचायेकूगु खः । थ्व झ्वलय् बाराही प्याखं, सिम्बाःधुम्बा न्या लाकेगु प्याखं, महाकाली प्याखं, श्वैत भैरव न्यालाकेगु प्याखं न्ह्यब्वःगु खः । प्याखं क्वचायेकाः स्थानीयपिनि पुजा फयाः द्यः लिहां बिज्याःगु खँ मध्यपुर थिमि नगरपालिकाया उपप्रमुख विजयकृष्ण श्रेष्ठं कनादिल ।

थिमिया दिगुत्वालं सुरु जूगु नवदुर्गा प्याखं चपाचोय् प्यम्ह द्यःया प्याखं, भुँलाख्यलय् प्यम्ह द्यःया प्याखं व खां प्याखं, नगदेश, बोड, दथुत्वाः, दधिकोटया चित्रपुर, थिमिया मरुत्वाः व वप्पा महादेव क्षेत्रय् मूवाहन लिकेगु प्याखं क्यंगु खः ।

नवदुर्गा व्यवस्थापन समितिया सचिव रत्नमान वनमालाया कथं नवदुर्गा प्याखनय् थीथी द्यःगणपिं तान्त्रिक विधि कथं प्याखं ल्हुइगु याइ । थ्व प्याखंया इलय् नवदुर्गादेवी प्रकट जुइगु जनविश्वास यानातःगु दु । थिमिइ नवदुर्गा प्याखं हुइकेगु निंतिं नगरपालिकां बजेट हे व्यवस्था यानातःगु दु ।