एमालेय् हानं ओली गुटया भेला
येँ- प्रमुख प्रतिपक्षी पार्टी नेकपा एमालेया अध्यक्ष केपी शर्मा ओलीं थःगु पार्टी दुने हाकनं थःगु हे गुटया नेतात जक सःताः भेला यायेगु तयारी यायेवं माधव नेपालयात त्वःताः ओलीयात साथ बिउ वःपिं नेतात असन्तुष्ट जूगु दु ।
ओलीयात साथ बिउपिं स्वंगूगु धारया नेतातय्त जानकारी तकं मबिसे अध्यक्ष ओलीं थौं एमालेया भातृ संगठनत प्रगतिशील तथा पेशागत कानुन व्यवसायी संगठन नेपाल (पीपीएलए) या बैठक सःतूगु दु । थुकिं यानाः एमाले दुने हाकनं कचवं पिहां वःगु खँ सूत्रं धाःगु दु ।
वंगु भदौ ९ गते एमाले केन्द्रीय कमिटीया बैठकं पार्टीयात २०७५ जेठ २ गतेया अवस्थाय् यंकाः क्रियाशील यायेगु निर्णय यासें अपानि तकं जारी याःगु खः । तर अध्यक्ष ओली थौं थःलिसे सतीपिं जक कानुन व्यवसायीतय्त सःताः ज्याझ्वःया ग्वसाः ग्वयेवं ओली हाकनं याकःचा न्ह्याः वनेत्यंगु आशंका यानाहःगु दु ।
अध्यक्ष ओलीं पीपीएलएया अध्यक्ष रुद्रप्रसाद नेपालयात छुं कथं जानकारी तकं मबिसे पीपीएलएया नामय् केन्द्रीय समितिया भेला सःतूगु खः । यलया तुल्सीलाल प्रतिष्ठानय् यायेत्यंगु उगु भेलाया मूपाहां कथं अध्यक्ष ओलीं सम्बोधन याइगु ज्याझ्वः दु । तर अध्यक्ष नेपालं थःपिंसं उगु भेला संस्थागत रुपं सःतागु मखुगुलिं उगु भेलाय् ब्वति मकायेत सुचं जारी यानादीगु दु ।
नेपालं सामाजिक सञ्जालपाखें जारी याःगु सुचनय् धयातःगु दु, ‘सामाजिक सञ्जालपाखें कन्हय् भदौ १८ गते सःतूगु धाःगु भेला संस्थागत निर्णय बिना जूगुलिं उगु भेलायात कयाः पीपीएलएयात
संस्थागत रुपं गुगुं नं कथं जानकारी मदुगु व्यहोरा अनुरोध दु, पीपीएलएया एकता ल्यंके यःपिं कानुन व्यवसायीयात उगु भेलाय् ब्वति मकायेत हार्दिक अपिल यानाच्वना ।’
छखे पीपीएलएया अध्यक्ष नेपालं भेलाया बारे जानकारी मदुगु धकाः धयाच्वंगु दुसा मेखे संगठनया नामं हे भेलाया नितिं ब्वनापौ नं छ्वयातःगु दु । संगठनया आधिकारिक फेसबुकय् धयातःगु दु, ‘थुगु संगठनया सचिवालयया बैठक व केन्द्रीय समितिया भच्र्युअल बैठकय् सहलह जुयाः भदौ १८ गते २ बजे पुनर्जागरण भेला तयातयागुलिं कन्हय् भेला यथावत रुपय् सञ्चालन जुइगु व्यहोरा फुकसितं इनाप यासें कन्हय् २ बजे तुल्सीलाल स्मृति प्रतिष्ठान च्यासल यलय् जुइगु भेलाय् ब्वति कयादीत विनम्र इनाप यानाच्वना ।’
थौं ओलीं सःतातःगु उगु भेलाया बारे महासचिव ईश्वर पोखरेल, उपमहासचिव विष्णु पौडेल, सचिव गोकर्ण बिष्ट व नेता टोपबहादुर रायमाझीयात तकं जानकारी मदुगु खँ सूत्रं धाःगु दु । वय्कःपिं प्यम्हेसित एमालें फुक्कं जनसंगठनया एकीकरण व्यवस्थित यायेगु जिम्मा बियातःगु खः ।
अध्यक्ष ओलीया थ्व ज्यापाखें माधव नेपालयात त्वःताः एमालें वःपिं नेतात अन दुने निगूगु दर्जाया कार्यकर्ता जुइ मालीगु संकेत बिउगु खँ धाःगु दु ।
LEAVE YOUR COMMENTS