मा. जगतसुन्दर बुन्हि

येँ – नेपालभाषाया प्यंगःथां मध्ये छगः मास्टर जगत सुन्दर मल्लया १३८ दँ बुन्हि म्हिगः छगू ज्याझ्वः यासें न्यायेकल । थनया जगत सुन्दर ब्वनेकुथिपाखें वय्कःया झ्वाताय् स्वां देछासें थ्व हनाज्याझ्वः याःगु खः ।

थ्व लसताय् ब्वनेकुथिपाखें थः मस्तय् दथुइ मास्टर जगत सुन्दर मल्लया किपा च्वयेगु धेंधेंबल्लाः कासा याःगु खः । उकी सिरपाः त्याकूपिंत मल्ल (प्रधानांग) प्रतिष्ठान ख्वपया नायः डा. माधव सुन्दर मल्लं सिरपाः लःल्हानादीगु खः । डा. चुन्दा वज्राचार्यया सभा–पतित्वय् जूगु उगु ज्याझ्वलय् बिष्णु चित्रकार, वीरेन्द्र नकर्मी, माया मानन्धर, कलाकार चन्दा श्रेष्ठ, अनार वज्राचार्य–पिंसं नं नुगःखँ तयादीगु खःसा प्रिन्सिपल सुनिता मानन्धरं लसकुस यानादीगु खः ।

कासाय् रवि श्रेष्ठ, पूर्णिमा तुलाधर, सुवास राजभण्डारी व सृजना तामाङयात छसिकथं न्हाप, लिउ, लियांलिउ व हःपाः सिरपाः लाःगु खः ।