सत्यनारायण बहादुर श्रेष्ठ प्रेस स्वतन्त्र सेनानी सिरपाः लःल्हात

यल (नेपालभाषा टाइम्स)÷ नेपाल पत्रकार महासंघया संस्थापक सत्यनारायण बहादुर श्रेष्ठया १०८ दँ बुन्हिया लसताय् वय्कःया नामं नीस्वनातःगु सत्यनारायणबहादुर श्रेष्ठ प्रेस स्वतन्त्रता सेनानी सिरपाः लःल्हाःगु दु । महासंघया संस्थापक अध्यक्ष श्रेष्ठया बारे शोध यानाः थीथी लेख, समाचार च्वयादीम्ह गोरखापत्र न्हिपौया वरिष्ठ पत्रकार लक्की चौधरीयात सिरपाः लःल्हाःगु खः ।

नेवाः पत्रकार राष्ट्रिय दबुलिं थुगुसी निसें बीगु सुरु याःगु थ्व सिरपाः शुक्रवाः यलय् जूगु छगू ज्याझ्वःया दथुइ मूपाहाँ प्रेस काउन्सिल नेपालया अध्यक्ष बालकृष्ण बस्नेतं दसिपौ लःल्हानादीगु खःसा सिरपाःया दाता श्रेष्ठया म्ह्याय्मय्जु सुजिता मानन्धरं नीन्याद्वः तका दां लःल्हानादीगु खः ।

ज्याझ्वलय् न्ववासें काउन्सिलया अध्यक्ष बस्नेतं सत्यनारायण बहादुर श्रेष्ठ नेपाल पत्रकार महासंघया संस्थापक अध्यक्ष खः धयागु खँ छर्लङ्ग हे दुगु धासें वय्कःया महासंघया संस्थापक अध्यक्ष कथं स्थापित यायेत थप अध्ययन अनुसन्धान ययोत प्रेस काउन्सिलं माःगु ग्वाहालि बीगु प्रतिबद्धता प्वंकादीगु दु ।

भाजु श्रेष्ठं २००८ सालय् पत्रकारतय्गु हकहितया निंतिं ज्या याइगु कथं थःगु अध्यक्षताय् नेपाल पत्रकार संघ नीस्वनादीगु खः । थ्व पत्रकार संघ लिपा वनाः महासंघ जूगु खः । तर थौंकन्हय् महासंघया अध्यक्ष कथं नेपाली कांग्रेसया पुलांम्ह सभापति व पुलांम्ह प्रधानमन्त्री कृष्णप्रसाद भट्टराईयात नाला वयाच्वंगु दु । वय्कः वि.सं. २०१२ सालय् पत्रकार संघया पुनर्गठन यानाः अध्यक्ष जुयादीम्ह खः । तर थौंकन्हय् महासंघया संस्थापक अध्यक्ष कथं पूर्वप्रधानमन्त्री भट्टराईयात नाला वयाच्वंगुलिं नेवाः पत्रकार राष्ट्रिय दबुलिं महासंघया संस्थापक अध्यक्ष श्रेष्ठ हे क्वःछीमाःगु माग यासें थीथी ज्याझ्वः याना वयाच्वंगु दु ।

नेपाल टुडेया सम्पादक श्रेष्ठ महासंघया संस्थापक अध्यक्ष जूगु खँ प्रचार प्रसार यायेगु निंतिं दबुलिं थुगुसी हे सत्यनारायण बहादुर श्रेष्ठ स्मृति फुटसल नं याःगु खः । फुटसलय् विजयी जूपिंत नं शुक्रवाः हे कप व मेडल लःल्हाःगु खः । फुटसल धेंधेंबल्लाखय् नेपाल पत्रकार राष्ट्रिय दबू चितवन शाखा न्हाप, येँ शाखा ल्यू, नेवाः कलाकार पुचः लियांल्यू व पत्रकार दबू केन्द्र हःपाः लाःगु खः ।

ज्याझ्वलय् न्ववासें दबूया अध्यक्ष नृपेन्द्रलाल श्रेष्ठं भाजु श्रेष्ठयात संस्थापक अध्यक्षय् स्थापित यायेगु निंतिं दबुलिं प्यदँ न्ह्यवनिसें थीथी ज्याझ्वः याना वयाच्वनागु खँ न्ह्यथनादिसें थ्व अभियानयात अझ वृहत् रुपं न्ह्याकायंकेगु खँ धयादिल ।

अथेहे श्रेष्ठया म्ह्याय् सुजिता मानन्धरं पत्रकारिता याना वयाच्वंम्ह थः अबु देशय् खनेदयाच्वंगु राजनीतिं वितृष्णा जुयाः शिक्षा क्षेत्रय् दुहां वःगु खँ कनादिल । यलया नांजाःगु स्कूल आदर्श विद्या मन्दिरया स्थापना यानादीम्ह भाजु श्रेष्ठं नेपाःया अग्रज शिक्षाविद् नं खः ।

ज्याझ्वलय् न्ववानादिसें सिरपाः त्याकादीम्ह चौधरीं थ्व सम्मानं थःत संस्थापक अध्यक्ष श्रेष्ठया बारे अझ अनुसन्धान यायेगु जिम्मेवारी वःगु धासें पत्रकार महासंघं छन्हु कि छन्हु भाजु श्रेष्ठया संस्थापक अध्यक्ष नाले हे माःगु अवस्था वइ धयादिल ।

दबूया ख्वाःपौ ‘आज्जु’ नं विमोचन जूगु ज्याझ्वलय् थुकिया प्रधान सम्पादक सुरजवीर वज्राचार्य व भिडियो फोटो संयोजक अनुप प्रधान, फुटसलया संयोजक प्रजित शाक्य, सत्यनारायणबहादु श्रेष्ठ १०८ जन्मजयन्तीया संयोजक राजु नापितपिंत नं सुभाय्पौ लःल्हाःगु खः ।