जनजाति पार्टीतय् राष्ट्रिय सम्मेलन जुइगु

येँ – थीथी जनजाति पार्टी दथुइ एकीकरण यानाः न्ह्याः वनेगु विषयय् वंगु शनिवाः छगू सहलह मुँज्या जुल । नेपाः राष्ट्रिय पार्टीया ज्याकुथिइ जूगु सहलह मुँज्याय् पहिचान सहितया संघीयता पलिस्थाया निंतिं जुयाच्वंगु कुतः ताःलाकेगु विषयय् नं सहलह जूगु खः ।

अथे हे छुं दिं न्ह्यः जक नेपाःया निंतिं युरोपेली युनियन (ईयु)या राजदूत मय्जु भेरोनिका कोडीनापं जूगु सहलहयात कयाः नं मुँज्याय् समीक्षा यायेगु ज्या जूगु खः । नापं आःया परिस्थितिइ सकल जनजातित छप्पँ जुयाः वने मफुत धाःसा पहिचानया आन्दोलन अझं लिउने लाइगु निष्कर्ष मुँज्यां पिकाःगु दु ।

प्यदँ लिपा हाकनं जुइगु निर्वाचनया इलय् तकया दुने अफ्रिकी नेशनल कंग्रेस (एएनसी)या मोडेलकथं सकल जनजातित छगू हे चुनाव चिं कयाः वनेमाःगु खँय् नं मुँज्याय् सहभागि नेतातय्सं बः बिउगु दु । थुगु अवधारणायात सार्थकता बीत छगू राष्ट्रिय तयारी समिति गठन यायेगु व राष्ट्रिय सम्मेलन यायेगु नं मुँज्यां क्वःछिउगु दु ।

सम्मेनलनया निंतिं राष्ट्रिय तयारी समितिइ प्रत्येक पार्टीपाखें स्वम्ह स्वम्ह प्रतिनिधि मनोनित यायेगु नं मुँज्यां निर्णय याःगु दु । थ्व स्वयां न्ह्यः जनजाति पार्टीया बैठकं नेपाः पार्टीया खड्ग चुनाव चिं कयाः पार्टीत आः जुइगु चुनावय् कुहां वयेगु छगूकथं सैद्धान्तिक सहमति याःगु खःसां छुं छुं प्राविधिक समस्या वःगुलिं उकी सहमति जुइ मफयाच्वंगु व उकिया निंतिं नं कुतः जुयाच्वंगु बैठकय् दुथ्याःम्ह छम्ह नेतां कनादीगु दु ।

मुँज्याय् नेपाः पार्टीया नायः डा. विजयप्रकाश सैंजू, सचिव कस्तुरी श्रेष्ठ, प्रवक्ता अनिल सिं सुवाल, विष्णु गोपाली, खगेश रंजित नापं लिम्बुवान पार्टीया कुमार लिङ्देन, खम्बुवान पार्टीया नायः नापं पुलांम्ह सभासद रामकुमार खम्बु,, थरुहट पार्टीया भानुराम थारु, आदिवासी जनजाति पार्टीया नायः बुद्धराज स्यांगतांग, खसान संघर्ष समितिया नायः प्रेमबहादुर खाती लगायतया नेतातय् उपस्थिति दुगु खः ।