भोजपुरय् तःजिक स्वांयाःपुन्हि

येँ – शाक्यमुनि भगवान बुद्धया २५६२ क्वःगु स्वांयाःपुन्हि भोजपुरय् तःजिक हंगु दु । शाक्यमुनि बौद्ध संघ भोजपुरया ग्वसालय् स्वांयाःपुन्हिकुन्हु सुथय् ज्ञानमाला भजन, बुद्ध पुजा व धर्मदेशना ज्याझ्वः यासें तःजिक हंगु खः । थुकथं हे न्हिनय् तःजिक छायेपियातःगु खतय् बुद्ध मूर्ति तयाः भोजपुर बजाः परिक्रमा याःगु खःसा वयां लिपा छगू सभाया नं ग्वसाः ग्वःगु खः ।

सभाय् भोजपुर नगरपालिकाया प्रमुख वीरबल राईं स्वांयाःपुन्हिया महत्वयात कयाः थःगु नुगःखँ तयादीगु खःसा संघया ब्वनाय् येँय् नं वंगु दी शाक्य फाउण्डेसनया नायः अमीररत्न शाक्यं थौंया इलय् बुद्ध शिक्षाया आवश्यकतायात कयाः नुगःखँ तयादीगु खः ।

संघया नायः प्रकाशचन्द्र शाक्यया सभापतित्वय् जूगु ज्याझ्वलय् फाउण्डेसनया नायःपाखें संघयात झिद्वः तका दांलिसें लुमन्ति चिं लःल्हाःगु खःसा संघपाखें नं फाउण्डेसनयात लुमन्ति चिंकथं भोजपुरया करुवा लःल्हानादीगु खः ।