दँय्दसं जुइ भारतया कारणं नेपाः डुबान, नेपालं खँ तये मफुगु छाय् ?

येँ – दँय्दसं थें थुगुसी नं खुसिबाः वयाः तराई आपालं भूभाग डुबानय् लाःगु दु । नेपाःया भूमि थथे डुबानय् लाःगुया मू कारण भारतं नेपाःया सीमा लिक्क वयाः दयेकातःगु थीथी कथंया बाँध खः । थ्व बाँधया कारणं दँय्दसं हे नेपाःया भूमि डुबानय् लानाच्वंसां नेपाः सरकारं भारत समक्ष थुकिया बारे खँ तये मफुगुया कारण छु ?

थौंकन्हय् राजनीतिक व कुटनीतिक ख्यलय् थ्व न्ह्यसः पिदनाच्वंगु दु ।गुलिखे थासय् भारतं बाँध मदयेकूसां खुसि सिथय् ततःजाःगु लँ दयेकेगु ज्या याना हयाच्वंगु दु । न्ह्याबलें खुसिबालं कटान यात धकाः भारतं थःगु लागाय् ततःजाः यानाः लँ दयेका हयाच्वंगु दु । थ्व लं नं छगू कथं बाँधया हे ज्या याइ ।

नेपाःपाखे छुं हे संरचना मदु, भारतपाखे धाःसा थज्याःगु ततःजाःगु संरचना दयेका हःगुलिं खुसिबाः वइबलय् न्ह्याबलें नं लः नेपाःपाखे हे दुहां वइगु जुयाच्वंगु दु । थुकिया बारे नं नेपाः सरकारं गबलें हे ध्यान मबिउगु उगु द्वपं दु ।

भारतं दयेका तःगु बाँध व थज्याःगु सतकं यानाः हे नेपाः लागाय् डुबान जुयाच्वंगु खः धइगु स्पष्ट जुइधुंकाः नं नेपालं भारतया न्ह्यःने छाय् स्पष्ट खँ तये मफुत धइगु न्ह्यसः थ्व इलय् हानं दना वःगु दु ।छुं विज्ञतय्सं थुकिया बारे यदि भारतं खँ मन्यन धाःसा अन्तर्राष्ट्रिय अदालतय् वनाः मुद्दा तयेगु अधिकार नेपाःयाके दु धकाः नं सुझाव बियाहःगु दु ।

तर नेपाः सरकारं धाःसा थथे यानाः वनेबलय् छुं जुयाः मुद्दाय् नेपाः त्या हे त्यात धाःसां नं मुद्दा बूगु कारणं भारतं नेपाःलिसे झन् बांमलाःगु व्यवहार याये फुगु जुयाः कुटनीतिक व राजनीतिक च्यानल मार्फत हे समाधान यायेत स्वयाच्वंगु खँ सीदुगु दु ।

नेपाःयाके दु अध्ययन रिपोर्ट
भारतं यकःति रुपं दयेकातःगु बाँधं यानाः नेपाःया भूमि डुबानय् लानाच्वंगु बारे नेपालं भारत सरकारया न्ह्यःने गबलें नं खँ मल्ह्वंसां भारतं गन गन दयेका तःगु बाँधं यानाः नेपाःया गन गनया भूमि डुबानय् लाइगु जुयाच्वंगु दु धइगु बारे नेपाः सरकारं अध्ययन यानाः पूवंक रिपोर्ट धाःसा दयेकातःगु खँ सीदुगु दु ।

जलश्रोत मन्त्रालय अन्तर्गत जल उत्पन्न प्रकोप व्यवस्थापन महाशाखां नेपाःया पूर्व मेचींनिसें पश्चिम महाकाली तक हे फिल्ड भ्रमण यानाः उकिया रिपोर्ट तयार याःगु खः । महाशाखा थम्हं हे भारतयात उकिया बारे जानकारी यायेगु मिले मजूगु जूगुलिं महाशाखां थ्व रिपोर्ट परराष्ट्र मन्त्रालययात नं बिउगु दु ।

परराष्ट्रयात रिपोर्ट बिउगुया अर्थ भारतलिसे खँ ल्हायेगु लागिं हे खः । तर परराष्ट्रं धाःसा आः तक भारतलिसे थुकिया बारे खँ ल्हाःगु मदुनि । नेपाःया सीमाय् थथे बाँध दयेकेगु ज्या भारतया थीथी प्रान्तीय सरकारतय्सं याइगु जूगुलिं भारतया केन्द्र सरकारं थुकी छुं याये फइ मखु धइगु खँ नं वयाच्वंगु सीदुगु दु ।

सम्बन्धित बुखँ

LEAVE YOUR COMMENTS