‘वार्ता ताहाकयेका डा. केसीयात स्यायेगु कुतः जुयाच्वन’

येँ (नेपालभाषा टाइम्स) – चिकित्सा शिक्षा सुधार यायेगु माग यासें झिंगुक्वः अनसन च्वनाच्वंम्ह डा. गो विन्द केसीया स्वास्थ्य स्थिति गम्भिर समस्या खने दये धुंकाः नं सरकार उदासिन जूगु धासें म्हिगः माइतीघर मण्डलाय् प्रदर्शन जूगु दु । वंगु बिहीवाः डा. केसी सरकारी पक्ष दथुइ वार्ता जूगु खःसा उगु वार्ताय् निगुलिं पक्ष दथुइ सहमति जुइधुंकाः सहमतिया बुँदायात कयाः प्रधानमन्त्री केपी शर्मा ओलीया राय कयाः मेगु सहमति यायेगु सम्झौ ता जूगु खः ।

थ्वहे झ्वलय् प्रदर्शनकारीपिंसं वार्तायात असफल यानाः डा. केसीया जीवन हे समाप्त यायेगु सरकारया नियत दुगु द्वपं बिउगु दु । म्हिगः जूगु प्रदर्शनय् ब्वति कयादीम्ह वार्ता पुचःया दुजः अधिवक्ता ओमप्रकाश अर्यालं वंगु बिहीवाः सरकारी पक्ष लिसे समझदारी जूसां नं प्रधानमन्त्री केपी शर्मा ओली व शिक्षा, विज्ञान तथा प्रविधि मन्त्री गिरीराजमणि पोखरेलया निर्देशनय् सहमति यायेगु ज्या दिउगु द्वपं बियादीगु दु । वय्कलं धयादी, ‘प्रधानमन्त्री व मन्त्रीया निर्देशनय् वार्ता दिउगु धइगु डा. केसीया जीवनय् न्ह्याग्गु जूसां नं थःपिंत सरोकार मदु धइगु नकारात्मक सोच खः ।’

म्हिगः जूगु प्रदर्शनय् प्रदर्शनकारीपिंसं ‘माफियाया समाजवाद, यती, ओम्नी, मार्सी भात; सत्याग्रहीयात स्यायेत स्वइगु सरकार अप्वः तिके जुइ मखु; डा. केसीया माग पूवंकी; दूरदराजय् मेडिकल शिक्षा ग्वः ?’ धइगु प्लेकार्ड प्रदर्शन नं याःगु खः ।

थ्वहे झ्वलय् म्हिगः सरकारी वार्ता पुचलं डा. केसीया अनसन अन्त्य यायेत इनाप याःगु दु । डा. केसी व सरकारी वार्ता पुचःया दथुइ सहमतिया कुतः असफल जुइवं म्हिगः शिक्षा सचिव गोपी मैनालीया पुचलं छगू वक्तव्य जारी यासें डा. केसीया माग बारे थःपिनिगु धापू नं सार्वजनिक याःगु दु ।

मैनालीं जारी याःगु वक्तव्यय् सरकारी मेडिकल कलेज व प्रतिष्ठानय् चिकित्सा शिक्षाया थीथी तह व विषयसं शैक्षिक ज्याझ्वः यायेत बजेट विनियो जन जुइधुंकूगु लिसे योजनावद्ध रुपं ज्या जुयाच्वंगु खँ धयातःगु दु । विज्ञप्तिइ ‘कोभिड-महामारीया कारणं देय् आक्रान्त जुयाच्वंगु विषम परिस्थितियात मनन यानाः अनसन अन्त्य यायेत प्रा. डा. केसीयात वार्ता समितिं इनाप याना’ धयातःगु दु ।