लँ मदयेकूगुलिं मन्त्रीलिसे जनताया जवाःसवाः
येँ (नेपालभाषा टाइम्स)÷ कमल विनायकं नगरकोट वनेगु लँया अनुगमनय् वंम्ह भौतिक पूर्वाधार तथा यातायात मन्त्री नारायणकाजी श्रेष्ठयात स्थानीय वासिन्दां तं प्वंकूगु दु ।
भारतीय राजदूत नवीन श्रीवास्तव सहित वंगु अनुगमन पुचःयात स्थानीय जनतां मन्त्री हिउसां नं सतकया हालत महिउगु धासें आक्रोस प्वंकूगु खः ।
स्थानीय वासिन्दां लँ दयेकेगु ज्या न्ह्याकूगु गुदँ दयेधुंकूगु व थःपिंसं गुलि धू नयेगु लिसे धू नयाः हे सीगु ला धकाः मन्त्री श्रेष्ठयात न्ह्यसः थ्यंगु खः । लिसे उमिसं इलय् सतकया ज्या क्वमचायेकूगु ठेकेदारयात हाकुगु धलखय् तयेमाःगुलिं सरकारं संरक्षण यानाच्वंगु द्वपं बिसें आक्रोश प्वंकूगु खः ।
लिसः बीगु झ्वलय् मन्त्री श्रेष्ठं निदँया दुने क्वचायेमाःगु सतक गुदँ तक क्वमचाःगु लज्जास्पद खः व थुकी जनता आक्रोशित जुइगु स्वाभाविक जूगु धासें धयादिल, जिपिं नं थ्व ज्यां सन्तुष्ट जुयाच्वनागु मदु, ज्या मयाइपिं ठेकेदारयात संरक्षण यायेगु जुइ मखु ।’
LEAVE YOUR COMMENTS