किपुलिइ दिप ल्यंकेत संघर्ष
किपू (नेपालभाषा टाइम्स)÷किपू नपा वडा नंं. ७ स्थित पांगामितय्गु भाजंगाः दिप संरक्षण यायेत किपूया स्थानीय जनता दना वःगु दु । उगु हे दिपया लागा जुयाः कार्की वस्ती वनेगु न्हूगु लँपु दयेका हयेवं स्थानीय मनूतय्सं उकिया विरोध याःगु खः ।
अन लँ दयेका हल धाःसा लिपा वनाः लँय् वये–वने याइपिंत मछिन धकाः दिपय् मनू उइगु ज्या हे बन्द याके फइगु सम्भावनायात ध्यानय् तयाः स्थानीय जनतां अन लँ पिकाये मजिउगु खँ धयाहःगु दु ।
थौंकन्हय् येँय् नं थीथी थासय् लँ खुले जुइवं पिनेयापिं मनूत वयाः च्वं वयेगु क्रम अप्वया वःगु व लिपा उमिसं स्थानीय जनताया परम्परागत दिपय् मनू उइ दइ मखु धकाः हस्तक्षेप याना हःगु खँयात मध्यनजर यासें किपुलिइ नं कन्हय् थ्वहे अवस्था वयेफुगु जूगुलिं आः हे सः तया हःगु खः ।
थुकिया लागिं अन वरिष्ठ साहित्यकार लिसें पत्रकार नजरराम महर्जनया अध्यक्षताय् बिष्णुदेवी चिहान संरक्षण संघर्ष समिति गठन याःगु दु । उगु संघर्ष समितिपाखें म्हिगः छगू ¥याली पिकासें किपू नगरपालिकाया मेयर राजकुमार नकर्मीयात ज्ञापनपौ लःल्हाःगु खः । ज्ञापनपौ लःल्हाना कासें मेयर नकर्मीं किपूमिया थ्व माग पूवंकेत थः तयार दुगु जानकारी बियादीगु खः । लिसें उगु दिप जुकाः दयेकेत्यंगु लँया निर्माण ज्या नं दिकेधुंकूगु खँ धाःगु दु ।
संघर्ष समितिया नायः नजरराम महर्जनं सामाजिक सञ्जालय् सार्वजनिक यानादीकथं अन नक्साय् गनं हे किटान मजूगु थासय् लँ पिकायेगु कुतः जूगु खः । उगु थासय् वनेगु लागिं मेगु हे लँ दुसां वहे थासं लँ पिकायेत्यंगु खँय् थःपिनि आपत्ति दुगु खँ नं वय्कलं कनादिल ।
भाजंगाःया थ्व दिपय् मनू उइबलय् चिता दयेकाः मि तया थकल धाःसा सीम्ह अथें उइ सिधइ धाइ ।
LEAVE YOUR COMMENTS