त्वाःत्वालय् मनपां वासः छ्वाकल

येँ – देय् छगुलिं लकडाउन जुयाच्वंगु इलय् येँ महानगरपालिकां राजधानीया थीथी थासय् कीटनाशक वासः छ्वाकेगु ज्या न्ह्याकूगु दु । महानगरपालिकाया गाडीपाखें म्हिगःनिसें थ्व ज्या न्ह्याकूगु खःसा थौं नं येँया थीथी थासय् थ्व ज्या यानाच्वंगु दु ।

येँ मनपाया मेयर विद्यासुन्दर शाक्यं कनादी कथं येँय् खास यानाः मनूतय् भीड अप्वः जुइगु थाय् कालिमाटी, ताहाचल, वीर अस्पताल, न्हू सतक आदि लागाय् थ्व वासः छ्वाकेगु ज्या याःगु खः । थ्व ज्याया लागिं महानगरपालिकाया ४ हजार लिटर क्षमताया स्वंगः ट्यांकरं थाय्थासय् ब्वाँय् वनाः वासः छ्वाकाच्वंगु दु ।

थुकिया नापनापं कोरोनाया संक्रमण मजुइकेगु लागिं मेगु थप छु व्यवस्था यायेमाली धकाः सहलह यायेगु लागिं थौं मनपाया अनौपचारिक बैठक समेत राष्ट्रिय सभागृहय् च्वनाच्वंगु खँ सीदुगु दु ।

थौं न्हिनय् १२ बजेनिसें च्वंगु उगु बैठकय् लकडाउनया इलय् सर्वसाधारण जनतापाखें वयाच्वंगु थीथी गुनासोयात सम्बोधन यायेगु तयारी जुयाच्वंगु खँ सीदुगु दु ।

(ने. सं. ११४० चाैलाथ्व द्वितीया / वि. सं २०७६ चैत १३, बिहिवाः)