स्वक्वःगु याताजः श्याम विश्व सिरपाः लःल्हात

ख्वप(नेपालभाषा टाइम्स)÷ याताजः नेपालभाषा साहित्य दबूया ग्वसालय् जूगु छगू ज्याझ्वःया दथुइ स्वक्वःगु याताजः श्याम विश्व सिरपाः ११४३ लःल्हात । अमेरिकाय् च्वनाः साहित्य सेवा यानाच्वनादीम्ह वरिष्ठ कवि व चिबाखँ च्वमि डा. आनन्द जोशीयात स्वक्वःगु याताजः श्याम विश्व सिरपाः लःल्हाःगु खः । वय्कःया अनुपस्थितिइ दां सिरपाः न्याद्वः, न्यासः व न्यय्न्यातका दां सहित हनापौ दाता श्याम आशां विष्णुकेशरी ताम्राकारयात लःल्हानादीगु खः ।

उगु हे ज्याझ्वलय् श्याम आशां च्वयादीगु च्यागूगु चिबाखं मुना ‘थ्व देय्’ विमोचन जूगु खः । मूपाहाँ कवि डा. पुष्पराज राजकर्णिकारं सफूया विमोचन यानादीगु खः । मूपाहाँया थासं न्ववानादिसें भाजु राजभण्डारीं सः छगू फरक अभिव्यक्ति व याताजः थेंज्याःगु संघ संस्थापाखें चिबाखंया विकासय् तीब्रता ब्वलंकूगु न्ह्यथनादिसें बाखंया स्वरुप बांलासां विषयवस्तु क्वातु मजुल धाःसा स्यल्लाःगु सन्देश बीफइमखु धयादिल ।

डा. योगेन्द्र प्रधानं सभापतिया थासं न्ववानादिसें आः नं समाजय् शोषण, अन्याय, अत्याचार, बलात्कार, आतंकवाद, साम्राज्यवाद, असन्तोष जक व्यापक जुयाच्वंगु न्ह्यथनादिसें दुःख चिकेगु उपाय छु खः धयागु उपाय लुइकेगु हे थौंया साहित्यया उद्देश्य जुइमाः धयादिल । वरिष्ठ समालोचक पूर्ण ताम्राकारं राजनीतिक सचेतना व परिवर्तनया सः थ्वयेकेफुगु श्याम आशाया चिबाखंया विशेषता जूगु कनादिसें ४५ दँनिसेंया अथक कुतः लिपा थज्याःगु परिमार्जित सफू पिथंगु सराहनीय जूगु न्ह्यथनादिल ।

विमल ताम्राकारं लसकुस यानादीगु ज्याझ्वः शरद कसां न्ह्याकादीगु खः । ज्याझ्वलय् पुरस्कृत व्यक्तित्व डा. आनन्द जोशीं अमेरिकां छ््वयाहयादीगु भिन्तुना सन्देश नं ब्वनाः न्यंकादीगु खः ।