ख्वपया स्वस्थानी धलं: थीथी अनुभव

विनोद प्रजापति छम्ह ख्वपया नांजाःम्ह एथलेटिक्स कासामि खः । वं छुं हे आशा मकासें हनुमानघाट ख्वँह्रे धलं दनीपिं नापं हे जलसमाधी कयाः व्रत च्वनेगु यानाच्वंगु न्यादँ दयेधुंकल । थ्व झ्वलय् वं राष्ट्रिय अन्तर्राष्ट्रिय स्तरया थीथी कासाय् सफलता नं कयाच्वंगु दु । थुगुसी धाःसा धलं दनेत वःपिंत सैद्धान्तिक ज्ञान नं बिइमाः धकाः थीथी कथं धार्मिक व आध्यात्मिक ज्ञान बीगु ल्याखं सफू मियेगु ज्या नं याना च्वनादिल । अन म्वःल्हुयाः सिलामं तुलेत वइपिं मेपिंनापं थुगुसी नं वं थः नं समाहित जुयाः सिलामं तुल । म्वःल्हुयाः जलसमाधि नं काल । छुं दिं थथे ब्रत च्वनाः धोती छपु जक चिनाः सिलामं तुलेगु व म्वःल्हुयेगु ज्या यानाःलिं छगू धार्मिक संस्थां वय्कःयात सितिं हे धइथें भारतया पवित्र थाय् वृन्दावनया भ्रमणया लागिं अफर वयेवं धाःसा आः वय्कः उखे हे झायाच्वनादीगु दु ।

ख्वपया हे मेम्ह नांजाःम्ह एथलेक्टिस कासामि कान्छीमैंया कोजूं नं थुगुसी महानगरिय प्रहरी परिसर ख्वपय् स्वस्थानी धलं शुरु जुइगु दिंकुन्हु हे लाकाः तालिम हल उलेज्याय् नेवाः वसतय् थः नं प्रहरी जवान धइगु होस मदइ कथं थीथी कथंया पवित्र ज्या यानाः नं स्वस्थानीया ब्रतयात लुमंकाः च्वनादिल । ख्वपया हनुमानघाट ख्वँह्रेय् पौष शुक्ल पूर्णिमानिसें माघ शुक्ल पूर्णिमातक दँय्दसं च्वनीगु धलं दनेगु ज्याय् धाःसा विनोद थेंज्याःपिं मिजं स्वयाः नं मिस्त अनसं च्वनाः थीथी कठीन यात्रा पुवंकाच्वंगु दु । व्रतया झ्वलय् अन न्हापा न्हापा नीम्ह, स्वीम्ह व पीम्ह जुजुं पीन्याम्ह तक मिस्त छक्वलं च्वनेगु थाय् हे मदयेक व्रत च्वनेगु यानाच्वंगु खः । तर थुगुसी अन स्वम्ह हे जक मिस्त व्रत च्वनाच्वंगु दु । तालाक्व त्वाःया कृष्णमाया न्हिच्छिं छुं मनसें बहनी ८-९ बजे जुयाःलि जक छछाः नयाः अन व्रत च्वनेत वयेगु यानाच्वंगु दु । अथे हे जिथिम्ह ७३ दँ दुम्ह कृष्णमाया सिन्ताकल नं थःगु जिथि बैसयात तकं ध्यानय् मतसे व्रत च्वंच्वनादीगु दु ।
थज्याःगु कठीन व्रत च्वनेगु ज्याय् क्वाठण्डौया दिललक्ष्मी प्रजापति नं सहभागी जुयाच्वंगु दु । थुकथं न्हापा न्हापा श्रद्धापूर्वक मनूतय्सं अन वयाः व्रत च्वनीगु ज्या तकं आः बुलुहुं बुलुहुं ह्रास जुयाच्वंगु दु । गुलि नं अन व्रत च्वनाच्वंपिं दु, फुक्कं हे स्वस्फूर्त रुपं छेँजःपिं नापं सहलह ब्याकाः जक लछि अनसं च्वनेगु कथं थःगु छेँयात त्याग यानाः वयाच्वंपिं दु । मिजंतय्गु लागिं धाःसा अथे अनसं हे च्वनेमाः धइगु नं मदु । न्हिंन्हिं हे थःगु छेँय्नं अन वयाः नायःजुया उजं कथं थीथी द्यःया थासं सिलामं तुलाः उगु हनुमानघाट खुसिइ कुहां वनाः म्वःल्हुयाः पवित्र जुयाः अन दयेकातःगु कृतिम पुखू दुने लुकुंबियाः जलसमाधि कायेगु उमिगु सुथसिया नित्य ज्या जुइ । वयां लिपा धाःसा उपिं न्हिनय् थःथःगु छेँय् वनाः स्वतन्त्र जीवन हनाच्वनी । अथे खःसा नं उपिं स्वस्थ जुयाच्वंगु दु । थ्व अनुभूति धाःसा विनोदया स्वयां नीगुदँ न्ह्यः ब्रत शुरु यानाः आः तक नं निरन्तर दँय्दसं पुस माघ जुइवं ख्वँह्रेय् खने दयेकाः वयाच्वनीम्ह दुरुकाजी सुवालया दु । न्हय्न्यादँया बैसय् थ्यनाच्वंम्ह वय्कः आः तक नं हृष्टपुष्ट हे तिनि । वयात मेमेगु इलय् नं छुं कथंया ल्वय् दु धइगु मसिउ । थ्व मन पवित्र जूगुया लिच्वः हे खः ।

विक्रम संवत २०४५ सालं अन छगू सतः निर्माण यानाः च्वनेगु थाय् दसांनिसें निरन्तर व्रत च्वनेगु सुरु यानादीम्ह खौमा त्वालय् च्वंम्ह दुरुकाजी सुवालं थम्हं मनय् तयागु खँ पुवनाच्वंगु, स्वास्थ्य रक्षा जुयाच्वंगु नापनापं स्वस्थानी धलं धाःगु थ्व माधवनारायणया धलं दनेगु ज्याया लिच्वः कथं हे थःत ज्या यायेबलय् सफल जुयाः फाइदै फाइदा जक जुयाच्वंगु कनादिल । स्वम्ह काय् व छम्ह म्ह्याय्या अबु जुइधुंकाः निरन्तर थथे धलं दनेगु ज्याय् संलग्न जुयाः ख्वँह्रे वयाच्वनीम्ह वय्कःयात पुलांम्ह, ज्याथम्ह व बल्लाःम्ह कथं हे अन मेमेपिं व्रतालुतय्सं कयातःगु दु । ७५ दँया बैसय् नं सिलामं तुलाः ल्याय्म्हपिं सरह ग्वारा ग्वारा तुलाः वयाः नं धुक्क नक्सां म्वःल्हुयाः घौपलख लखय् लुकुंबियाः च्वनीबलय् मनूतय् मस्वसें हे मगाका बिइ ।
बिरामी मजुइगु व मन सन्तोष जुयाः यानागु ज्या सफल जुइगु थेंज्याःगु अप्रत्यक्ष फाइदा थुगु व्रत च्वनागुलिं चूलानाच्वंगु दुरुकाजीया अनुभव दु । विक्रम संवत १९९९ सालय् बुयाः बःचा धिकःबलय् छक्वः निक्वः व्रत च्वनाः त्वःताच्वंम्ह वय्कः २०४५ सालंनिसें धाःसा निरन्तर थुगु व्रतय् संलग्न जुयाच्वंम्ह खः । उगु व्रत च्वनेगु ज्याय् २०२२ सालंनिसें मदिकं ब्रत च्वनाः मेपिंत नं व्रत तयेगु ज्याय् दुथ्यानाच्वंम्ह छम्ह ब्रतालु धाःसा उद्धव खाइतू खः । वय्कः ब्रत च्वनीपिं गणया हे नायः खः । अन दयेकातःगु माधवनारायण व्रत सेवा समितिया वय्कः अध्यक्ष नं खः । थ्व लछि यंकं जुइगु व्रतया लागिं सुयातं धायेमाःसां, छुं यायेमाःसां वा छु तक मगाःमचाः जुल, उकियात पूवंकेगु लागिं निरन्तर लगे जुयाच्वनीम्ह व्यक्ति कथं सकसिनं वय्कःयात म्हसिउ । न्हापांनिसें तन, मन व धन बियाः लगे जुयाच्वंम्ह पात्र खःसां वय्कलं छुं आशा कयाः वा प्राप्तिया लागिं थथे धलं दनेगु ज्या यानागु मखु धयादिल । न्यय्स्वदँ तक्क मदिक धलं दनेगु ज्याय् हे जक संलग्न जुयाच्वंम्ह वय्कः खाइतू अन जुइगु लछि यंकंया पूजाविधि व ब्रत च्वनेगु फुक्कं विधि नं सिउम्ह खः । वय्कः शास्त्र कथं ज्या यायेमाः धाइगु धारणा ज्वनाः सःथें मसःथें शास्त्रीय परम्परायात कायम यायेत स्वइम्ह खः ।

थन न्हियान्हिथं मिस्त सुथय् म्वःल्हुयाः सिलामं तुला वइपिंत मथिसें अलग्ग हे च्वनाः श्रीस्वस्थानीयात स्नान याके हइगु इलय् लखय् च्वनाच्वनी । लखं पिने वयेवं धाःसा ब्रतालुतय्त ग्वाहालि यायेत च्वनाच्वंपिसं मि पंकाः ग्वाहालि याइ । थथे ग्वाहालि यायेगु ज्याय् जक झिंखुदँ थःत पानादीधुंकूम्ह भोलाछेँया सत्यमाया दुवालया अनुभव न्यने न्ह्यइपुसे च्वं । सिलामं तुलाः वइपिनि धोती हियेगु, उमिगु धोती ख्यलय् यंकाः पायेगु व न्हिछि पानाः हे तःसां बहनी दुकयाः हेरचाह यायेगु उमिगु ज्या खः । नापं मि पंकेत चन्दा कथं सु कयाःहयाः च्याकाः मि पंकेगु याइ । उमि नं लाकां न्ह्यायेगु ला छु थिइ तकं मत्यः धाइ । उमित नं मेपिं ब्रत मच्वंपिंसं थिइमत्यः । थः न्ह्याब्लें सेवा जक यानाच्वनेम्ह थगुने धाःसा छाय् ब्रत मच्वनेगु धकाः च्वनादिल । तर वय्कःयात स्वास्थ्यं साथ मबिल । सत्यमायां थगुने लछि ब्रत च्वनेधुंकाः हे धुलिखेल अस्पतालय् लछि च्वने माला वन । ब्रत लछि च्वंथें वय्कःयात वासः याकेत लछि तक धुलिखेल अस्पतालय् च्वनेमाःगु कारणं वय्कःयात काय्, म्ह्याय् व पासापिसं नं ब्रत च्वनेमते धायेवं सेवक हे जुयाच्वनादिल ।

ब्रत च्वनीपिंसं न्हि छछाः नइगु इलय् नं नैंक्याः, छोहरा, दुरु व चिनि जक नयेजिउ । चि तयाः छुं नं नयेमजिउ । अथे दयेकूगु तस्मि जक नयाः ब्रत च्वनेमाः । तर सत्यमायायात अथे दयेकातःगु तस्मि जा स्वये हे मयः । ख्वीच्यादँ दयेधुंकूम्ह वय्कःयात नं सेवा यायां हे गुकुन्हु गनं सिलामं तुलि व गनं ब्रत सुरु यानाः गथे क्वचायेकीगु व चाँगुनारायण, दक्षिणकाली, पन्ति गुकुन्हु वनी धइगु दिं तकं कन्थ वः । थन धलं दनीपिं छन्हु पन्ति, मेबलय् दक्षिणकाली व चाँगुनारायण वनीगु चलन दु । हनुमानघाटय् सूर्यविनायक, गुप्तेश्वर महादेव, हनुमन्तेश्वर, तःधीम्ह बुद्ध, सरस्वती, किरातेश्वर, तःधीम्ह गणेश नापं थीथी द्यःपिं दु । बार व तिथि स्वयाः गुम्ह द्यःया मेला लाइगु खः, उम्ह हे द्यःयाथाय्निसें व्रत च्वनीपिं मिजंत सिलामं तुलाः म्वःल्हुइत वनी ।

ताः ई निसें ख्वपया हे इज्जत जुयाच्वंगु हनुमानघाटय् स्नान यानाः थथे व्रत च्वनेगु चलन नेपाल संवत ७२२ सालंनिसें न्ह्यानाच्वंगु शास्त्रय् उल्लेख जुयाच्वंगु दु । थुलि पुलांगु चलन आः तकं दीगु धाःसा मदुनि । तर न्हापा गुलि च्वन्ह्यानाः मनूतय् आस्था ब्वलंगु खः, आः धाःसा बिस्तारं थथे ब्रत च्वनीपिं पाः जुजुं वनाच्वंगु दु । थ्व गथे जुल धकाः न्यनागु न्ह्यसलय् अन मचाबलय्निसें ब्रत च्वनाः मचा ल्याय्म्हचा जुइवं भचा लज्या चायाः विद्यार्थी जीवन ज्वःछि त्वःतालि आः न्यय्दँ पुले धुंकाः हाकनं थुगु हे व्रत च्वनेत वयाच्वनीम्ह विष्णुप्रसाद स्वंगःमिखां थाय् हे मदुगु खँ कनादिल । ख नं अन थुगुसी भुखाचं दुनाच्वंगु फुक्कं संरचना पुनःनिर्माण जुयाच्वंगुलिं यानाः च्वनेगु थाय् तकं अभाव जुयाच्वंगु दु । थःपिंसं माःकथं ब्यवस्था याये मफयागु खँ धाःसा अन हे बुयाः अन हे ख्वीदँया बैस फुकेधुंकूम्ह बःजु गोपाल शर्मां स्वीकार यानादिल । वय्कः न्हियान्हिथं तिलमानवनारायण द्यः ज्वनाः स्नान याकेत अन थ्यंकेमाःम्ह बाज्या खः । मदुम्ह कृष्णगोपाल सैंजू व तौलाछेँ निवासी भाइचा किसी (प्रजापति)या प्रेरणां थः व्रत सुरु यानागु व मचाबलय् गुच्चा म्हिताच्वनाम्हेसित अथे ई सितिं छ्वये मजिउ पवित्र ज्याय् लगे जुइमाः धायेवं व्रत शुरु यानादीम्ह विष्णुप्रसाद स्वंगःमिखां समितिपाखें थन यायेमाःगु ब्यवस्था यायेमफुगु कारणं हे समस्या जुयाच्वंगु द्वपं बियादिल ।

स्वस्थानी व्रत सुरु जुइ प्यन्हुति न्ह्यः ख्वप नगरपालिकाया मेयर सुनिल प्रजापति थः हे न्ह्यःने च्वनाः थन विशेष सफाई ज्या न्ह्याकूगु खः । उकिं जक थन कृतिम पुखू तयार जुयाः भचा बांलाःगु लः मुंके फयाच्वंगु खः । मखुत धाःसा थुगु थाय् ला निकास ल्वाकज्याःगु धः जक बाःवयाः ताकुसे च्वंक नँवयाच्वंगु खुसि जुये धुंकूगु थाय् खः । दीर्घकालीन रुपं थन सफाई याये मफुसां अस्थायी ज्या जूगु दु । वःगु चन्दा सुचुकेगु व माःगु ज्याय् छ्यले मफुगु गुनासो ब्रतालुतय्सं हे यानाच्वंगु दु । टौमढी त्वाःया तिलमाधवनारायण, इटाछेँया माधवनारायण, श्रीपञ्चमीकुन्हु ख्वपया तौलाछेँ त्वालय् च्वंम्ह वाकुपति चाँगुनारायण, तुलाछेँ व चासुख्यलय् च्वंपिं थीथी नारायण द्यःयाथासं नं ब्रतालुत थथे हे सिलामं तुलाः वयेगु चलन दु । थ्व कठिन ब्रतया लागिं स्थानीय निकाय, धार्मिक संघ संस्थापाखें सुविधाया मखु कि ब्यवस्थापनया ग्वाहालि यात धाःसा गाःगु खँ ब्रतालु विष्णुप्रसाद स्वंगःमिखां कनादिल । यक्ष मल्लया पालंनिसें हे थःपिनि पूर्खायात अन ज्या यायेगु कथं जिम्मेवारी बियातःगु गोपाल शर्मां कनादिल । ब्रत च्वनीपिं तुते हे जुये धुंकूसां जलाशयन च्वनीपिं तुते मजूगु खँ नं वय्कलं कनादिल ।