ठमेलया दुवाः दुवातय् सिसी क्यामेरा

ठमेल पर्यटन विकास परिषदया पहल व येँ महानगरपालिका लिसें काठमाडौँ उपत्यका प्रहरी कार्यालयया ग्वाहालिइ थँबही (ठमेल) या फुक्क हे दुवातय् सिसी क्यामेरा तयेगु ज्या जूगु दु ।

परिषदया अध्यक्ष भविश्वर शर्मां ठमेल क्षेत्रया शान्तिसुरक्षा क्वातुकाः थ्व लागायात यचुसे पिचुसे, सुरक्षित व व्यवस्थित याना तयेगु लागिं सिसी क्यामरा तयागु खँ कनादिल ।

अध्यक्ष शर्मां ठमेल दुने लाःगु लैनचौर मार्ग, क्षेत्रपाटी मार्ग, नर्सिङ चोक मार्ग, भगवती बहाः मार्ग, चाक्सीबारी मार्ग, सातघुम्ती मार्ग, जेपी लाइन मार्ग व पर्यटन मार्ग दुने समेत यानाः ८० गः सिसी क्यामेरा जडान यानागु खँ कनादिल । “आः ततःग्वःगु प्यंगः क्यामरा लिसें ११२ गः सिसी क्यामरा जडान यायेगु कथं ज्या यानाच्वंगु दु । आः तक ८० गः क्यामरा तयेगु ज्या क्वचायेधुंकल,” अध्यक्ष शर्मां कनादिल ।

ठमेल लागाय् सिसी क्यामरा तयेत थ्व स्वयां न्ह्यः येँया महानगर प्रहरी, उपत्यका प्रहरी कार्यालय व ठमेल पर्यटन विकास परिषद्या प्रतिनिधितय्सं ठमेल लागा दुने आवश्यक जुइगु सिसी क्यामराया अध्ययन नं याःगु खः ।

परिषदया उपाध्यक्ष सहदेव धमलां ठमेल लागाय् जुइगु आपराधिक ज्याखँत पनेगु लागिं सिसी क्यामरां ग्वाहालि याइगु खँ कनादिल । विसं २०४७ य् ठमेल लागा विकासका लागि नीस्वंगु परिषदय् ठमेल लागा दुनेया निद्वः स्वयां अप्वः. छेँथुवाः व व्यवसायी दुथ्यानाच्वंगु दु । परिषदं ठमेल लागाया विकासया ख्यलय् ज्या याना वयाच्वंगु दु ।

परिषदं ठमेल लागाया फुक्क हे गल्लि पीच यायेत सम्बन्धित निकायलिसे कुतः यानाच्वंगु दुसा मतया फुक्क हे थामय् मत तयेगु ज्या नं न्ह्याकूगु दु ।