आइसीसी नेपाली कासामितय् तलब बीत सहमत
येँ (नेपालभाषा टाइम्स)÷ राष्ट्रिय खेलकूद परिषद (राखेपं) निदँ न्ह्यव निसें मबिसे तयातःगु क्रिकेट कासामितय् तलब बिइगु जूगु दु । क्रिकेटय् वयाच्वंगु विवादया कारणं नेपाल क्रिकेट संघ (क्यान)यात अन्तर्राष्ट्रिय क्रिकेट परिषद (आइसीसीं) निलम्बन यानातःगु
कारणं क्रिकेट कासामितय् पारिश्रमिक मबिसे तयातःगु खः ।
आः आइसीसी व राखेप दथुइ तलब बिइगु सहमति जुइवं कासामितय्त बर्गिकरण कथं सन् २०१७ व २०१८ दँया तलब बीत्यंगु खँ राखेपया सदस्य सचिव केशवकुमार विस्टं धयादीगु दु ।
कासामितय् तलब बिइगु निंतिं राखेपं पहल याःगु खः । राखेपया इनाप कथं आइसीसी तलब बीत तयार जुइवं कासामित लिसे सम्झौता यानाः आइसीसी छ्वयेधुंकाः दु । राखेपया सदस्य सचिव बिष्टं वइगु छवाः निवाः दुने हे ध्यबा वइगु खँ धयादीगु दु ।
वि.सं. २०७३ वैशाखय् क्यान निलम्बन जुइवं नेपाली कासामितय्सं संगठन हे मदुसां ततःधंगु प्रतियोगिताय् ब्वति कयाच्वंगु खः । थ्व इलय्
नेपाली क्रिकेटया व्यवस्थापन फुक्कं आइसीसीं हे स्वयाच्वंगु खः ।
आइसीसीं तलब बीगु निंतिं कासामितय्त ए, बी सी यानाः स्वंगु ब्वय् ब्वथलातःगु दु । ए श्रेणीया कासामितय्त लय् ३५ हजार, बी श्रेणीया कासामितय्त २५ हजार व सी श्रेणीया कासामितय्त लय् १५ हजार तका बराबरया निदँया तलब छ्वयाहयेत्यंगु खः ।
ए श्रेणीया कासामिपिनि धलखय् कप्तान पारस खड्का, उपकप्तान ज्ञानेन्द्र मल्ल, सन्दीप लामिछाने, शरद भेषवाकर, वसन्त रेग्मी, सोमपाल कामी व दीपेन्द्र सिंह ऐरी लाः । अथेहे बी श्रेणीइ रोहितकुमार पौडेल, ललितनारायण राजवंशी, आरिफ शेख, करण केसी, ललित भण्डारी, अनिलकुमार शाह व शक्ति गौचन लाःसा सी श्रेणीया कासामिइ सुशन भारी, किशोर महतो, सुवास खकुरेल, सागर पुन, दिलिपनाथ, सुनिल धमला व विनोद भण्डारी लाः ।
क्यानं सन् २०१५ निसें कासामितय् बर्गीकरण यानाः लय् लय् तलब बिइगु सुरु याःगु खः, तर क्यान हे निलम्बन लायेवं निदँ न्ह्यवनिसें तलब थानाच्वंगु खः ।
LEAVE YOUR COMMENTS