थारूतय्गु आमरण अनसन शुरु

येँ -थारू आन्दोलनया झ्वलय् म्हिगःनिसें कैलालीइ थारू न्ह्यलुवातय्गु अनसन शुरु जूगु दु । उकी मध्ये थरुहट थारुवान राष्ट्रिय मोर्चाया नेता लक्ष्मण थारू आमरण अनसन च्वनादीगु दुसा मेपिं दुजःत रिले अनसनय् सहभागी जूगु दु । टिकापुर घटनाय् ल्हाः दुपिं धइगु द्वपं बियाः जेलय् कुनातःपिं ११ म्ह थारू आन्दोलनकारीतय् कलाःपिं नं अनसन च्वंगु दु । कैलालीया क्याम्पस चोक दुवातय् पाल ग्वयाः अनसन ज्याझ्वः न्ह्याकूगु खः ।

वंगु निवाः न्ह्यवंनिसें शुरु जूगु थारू आन्दोलनया घोषित ज्याझ्वः कथं म्हिगःनिसें थ्व अनसन शुरु जूगु खः । अनसन शुरु जुइवं मोर्चाया केन्द्रीय दुजः होरालाल चौधरीं सम्बोधन यानादीगु खःसा वयां लिपा मेपिं वक्तातय्सं न्ववानादीगु खः । अनसनया समर्थन यासें आदिवासी जनजाति महासंघया केन्द्रीय उपाध्यक्ष गोविन्द छन्त्याल, नेपाः पार्टीया अध्यक्ष डा. विजय सैंजु, खम्बुवान राष्ट्रिय मोर्चाया आर.के. खम्बु लगायत कुमार लिङदेन, रघुवीर ठुगुन्ना, सुरेन्द्र चौधरी, भानुराम थारू आदिपिंसं सम्बोधन यानादीगु खः ।

ग्वसाः खलः थरुहट थारुवान राष्ट्रिय मोर्चां संविधान संशोधन, थरुवान प्रदेश, राजपाया थारु सांसद रेशम चौधरीयात त्वःतेमाःगु व ज्वनातःपिं थारू अभियन्तातय्गु मुद्दा लित कायेमाःगु माग न्ह्यःने तःगु दु । मोर्चापाखें अनसन च्वनाः नं माग पूमवंकल धाःसा कैलाली बन्दया ज्याझ्वः नं तयातःगु दु । वयां लिपा अनिश्चितकालीन बन्द यानाः प्रशासन ठप्प यायेगु ज्याझ्वः नं मोर्चां दयेकातःगु दु । थ्व झ्वलय् मोर्चालिसे सरकारं वार्ताया कुतः यानाच्वंगु खँ धाःगु दु ।

सम्बन्धित बुखँ

LEAVE YOUR COMMENTS