थौं फास्ट ट्राय्क बारे निर्णय
खोना-बुंग जुयाः फास्ट ट्राय्क वनी वा मवनी थौं सी दइ
येँ (नेपालभाषा टाइम्स) – बुंग व खोनाय् दयेकाच्वंगु फास्ट ट्रयाकयात कयाः थौं सर्वोच्च अदालतं निर्णय बी फइगु खँ धाःगु दु । वंगु दत्या न्ह्यः खोना बुंगमति फास्ट ट्रायक पीडित संघर्ष समितिं सर्वोच्च अदालतय् रिट दायर याःगु खः । उगु इलय् समितिं फास्ट ट्रायक दयेकेगु ज्या दिकेमाःगु माग यासें अन्तरिम आदेश जारी यायेमाःगु माग याःगु खः । उकियात कयाः थौं सुनुवाइ जुइत्यंगु खःसा अन्तरिम आदेश जारी मयासे सर्वोच्च अदालतं तप्यंक फैसला यायेफइगु खँ सीदुगु दु ।
उगु मुद्दायात कयाः सरकारी निकायपाखें याकनं याकनं हे लिखित जवाफ वयेधुंकूगुलिं यानाः उकियात पूर्ण सुनुवाइ यायेगु आदेश अदालतं बीफइगु कानुनी प्रावधान दुगुलिं यानाः मुद्दायात याकनं क्वचायेकेगु कथं अज्याःगु निर्णय यायेफइगु खँ कानुनविद्पिंसं धाःगु दु । थौंया सुनुवाईया झ्वलय् संविधानविद् डा. पूर्णमान शाक्य, पुलांम्ह महान्यायाधिवक्ता मुक्ति प्रधान व आदिवासी जनजातीतय् वकिलतय् संगठन लाहुर्निपया महासचिव शंकर लिम्बु बहस यानादी ।
तर सूत्रया कथं थौं बहस याये न्ह्यः हे सर्वोच्च अदालतं पूर्ण सुनुवाइ यायेगु निर्णय बीफइगु खँ धाःगु दु । येँया थीथी थासय् सरकारं यानाच्वंगु अतिक्रमण नेपाःया हे संविधान व कानुन अःखः जूगु लिसें अन्तर्राष्ट्रिय प्रावधान अःखः जूगुलिं सर्वोच्च अदालतं पीडित पक्षय् निर्णय याये फइगु खँ धाःगु दु ।
उकथं हे थ्व स्वयां न्ह्यः स्वनिगःया सतक पीडित संघर्ष समितिं तःगु मुद्दाय् सरकारं आपालं थासय् पराजित जुइधुंकूगुलिं यानाः आः नं सरकारी ज्या अनैतिक जूगु धासें सर्वोच्च अदालतं थौं हे निर्णय बी फइगु सम्भावना दुगु खँ सीदुगु दु । तर थौं बहस उगु मुद्दायात कयाः पेशी तइ कि मतइ धइगु बारे मुद्दाय् बहस याइपिं व्यक्तितय्सं धाःसा स्पष्ट याःगु मदुनि ।
थ्व सम्बन्धय् ‘नेपालभाषा टाइम्सं’ सम्बन्धित मनूतय्त स्वापू तयाः उकिया बारे न्यनेकने यानागु खःसां नं कानुनी न्ह्यसः जूगुलिं थथे हे धायेफइगु अवस्था मदुगु खँ धाःगु दु । ‘थौं बहस जुइ मजुइ धइगु हे सीमदुनि अथे जुयाः उकियात कयाः थौं न्ववायेगु तसकं हथाय् जुइ,’ छम्ह नां कनेमयःम्ह अधिवक्तां धयादिल ।
थ्वहे झ्वलय् सीदु कथं सरकारं फास्ट ट्राय्कय् लाःगु जग्गाया मुआब्जा अप्वयेकत सहमत जूगु दु । तर स्थानीय जनतां धाःसा थःपिनिगु माग मुआब्जा अप्वयेकेगु मखुसें थःपिनिगु संस्कार संस्कृति ल्यंकेगु खः धासें उकियात अस्वीकार याःगु खँ सीदुगु दु । स्थानीय पीडितपिंसं थःपिनिगु अस्तित्व हे खतराय् लाइगु जूगुलिं फास्ट ट्रायकयात थःपिसं स्वीकार याये मफइगु जानकारी सरकारयात याकेधुंकूगु दु ।
थ्व स्वयां न्ह्यः अन जग्गा अधिग्रहण यायेगु ज्या ८० प्रतिशत क्वचायेधुंकल धकाः सेनां धायेगु यानाच्वंगु खःसा आः वयाः बछि स्वयां अप्वः जनतायात मुआब्जा बीगु कायेगु ल्यँ दनिगु खँ नेपालं सेनाः धयाहःगु दु ।
LEAVE YOUR COMMENTS