किपुलिइ देवी प्याखं प्रदर्शन

किपू – थगुने कोरोनाया कारणं स्थगित जूगु थनया देवी प्याखं थुगुसी क्यनेगु ज्या जुल । दँय्दसं मोहनि नखःया इलय् क्यनीगु थनया देवी प्याखं थुगुसी वंगु शनिवाः सार्वजनिक याःगु खः।
किपू नगरपालिका वडा नं. १० स्थित तःननि दाफा खलःपाखें उगु देवी प्याखं तःननि त्वालय् क्यनेज्या याःगु खः ।

किपूया हे अमूर्त सांस्कृतिक सम्पदाया रुपय् कयातःगु थुगु देवी प्याखनय् इन्द्रायणी, ब्रम्हायणी, भैरव, ख्याः, कवं, निम्ह प्व व दागिंनी यानाः च्याम्ह देवगण दइ । वंगु शनिवाः तःननिइ क्यंगु प्याखं वंगु कतिंपुन्हिकुन्हु चिलंच्वय् नं क्यंगु खः ।

आर्थिक श्रोत अभावया कारणं वंगु छुं दँ न्ह्यवंनिसें दिनाच्वंगु प्याखंयात संरक्षण यायेगु व निरन्तरता बीगु ल्याखं किपू नगरपालिकां छगू अक्षय कोष नं स्वना बिउगु खः ।
किपू नगरपालिका प्याखं संरक्षणया निंतिं १० गू लख दांया अक्षय कोषया व्यवस्था याना बिउगु खः ।