खड्गी समाजया उद्घोषण तालिम क्वचाल

येँ(नेपालभाषा टाइम्स)- नेपाल राष्ट्रिय खड्गी समाज येँ जिल्लाया ग्वसालय् जूगु उद्घोषण तालिम क्वचाःगु दु । समाजया येँ जिल्लाया ग्वसालय् छवाःयंकंया उगु तालिम नेपालभाषाया माध्यमं जूगु खः ।

येँ जिल्लाया नायः सुवास शाहीया सभापतित्वय् जूगु ज्याझ्वलय् मूपाहांकथं झायादीम्ह बागमति प्रदेश सभाया सांसद समिता खड्गी श्रेष्ठं प्रशिक्षार्थीतय्त दसिपौ लःल्हानादीगु खः । ज्याझ्वलय् नवासें मूपाहां बागमति प्रदेश सभा सदस्य श्रेष्ठं थनया थीथी जातजातिया अध्ययन अनुसन्धान बौद्धिकस्तरं जुइमाःगु खँय् बः बियादिसें खड्गी समुदायया अध्ययन अनुसन्धानया ज्या समाजं न्ह्याकेत व थुकिया निंतिं थम्हं फक्व ग्वाहालि यायेत तयार दु धयादिल ।

राष्ट्रिय भूमि आयोग येँ जिल्ला समितिया अध्यक्ष श्यामकृष्ण प्रजापतिं नवायेगु कलाया तालिम जक कायेगु मखसे आः सकसिनं थःथःगु हक अधिकारयात कयाः सः थ्वयेकेत नं इनाप यानादि ।

समाजया केन्द्रीय नायः नन्द किशोर शाही, येँ जिल्लाया न्वकु पुष्पराज शाही, सचिवलिसें प्रतीक खड्गीं नं नुगःखँ तयादीगु खःसा नीन्याम्हेसिनं प्रशिक्षण कयादीगु तालिम संचारकःमि विराजकाजी राजोपाध्यायं बियादीगु खः ।