टिकापुर बन्दी त्वःतूगुली कारण देखाउ

येँ (नेपालभाषा टाइम्स)- सर्वोच्च अदालतं टिकापुर काण्डया दोषी ठहर यासें जेलय् कुनातःपिं कैदीतय् सजाय मिनाहा यायेगु राष्ट्रपतिया निर्णय विरुद्ध कारण देखाउ आदेश जारी याःगु दु । म्हिगः सर्वोच्च अदालतया न्यायाधीश प्रकाशकुमार ढुंगानाया एकल इजलासं उगु आदेश बिउगु खः ।

टिकापुर घटनाया कैदीतय् सजाय मिनाहा यायेगु राष्ट्रपतिया पलाःयात कयाः शारदा कडायक, मन्धरादेवी विष्ट लगायतपिंसं वंगु कार्तिक २१ गते सर्वोच्च अदालतय् रिट निवेदन बिउगु खः । सरकारया सिफारिसय् राष्ट्रपति रामचन्द्र पौडेलं संविधान दिवसया न्हि कुन्हु लाकाः कैद मिनाहा यायेधुंकाः हरिनारयण चौधरी, विरबहादुर चौधरी व प्रदिप चौधरी वंगु असोज ३ गते रिहा जूगु खः ।

थ्व स्वयां न्ह्यः गणतन्त्र दिवसया लसताय् लाकाः रेशम चौधरीया कैद सजाय मिनाहा जूगु खःसा चौधरी अबले जेठ १५ गते रिहा जूगु खः । रेशम चौधरीया कैद मिनाहा यायेगु राष्ट्रपतिया निर्णय बदर जुइमाःगु माग यासें टिकापुर घटनाय् लानाः थः भाःत सीम्ह शारदा कठायकं वंगु जेठ १६ गते सर्वोच्च अदालतय् रिट तःगु खः । उकियात कयाः धाःसा सुनुवाई जूगु मदुनि ।

संविधान दिवस कुन्हु रिहा जूपिं कैदीत जेलं पिहां वःसां उलि लय्ताःगु धाःसा खनेमदु । छाय्धाःसां सरकारं उमित छुं हे दोष मदयेक ज्वनाः कुना बिउगु खः । थ्व घटनाय् प्रहरीं अज्याःपिं आपालं मनूतय्त ज्वनाः कुना बिउगु खः गुपिं थ्व घटना जूगु इलय् टिकापुरय् हे मदु । टिकापुर घटना लिपा प्रहरीतय्सं कफ्र्यु लगे यानाः अन च्वंपिं आपालं थारुतय्गु छेँय् मि तयेगु व लुटे यायेगु ज्या याःगु खः । थुकियात कयाः तयार यानातःगु लाल आयोगया प्रतिवेदन धाःसा सरकारं पित मबिसे तयातःगु दु ।