ने. सं. ११४६ चाैलागा चर्हे - मातातीर्थ चःह्रे

नेवाः नां तयाः संस्था दर्ता खुल्ला

येँ (नेपालभाषा टाइम्स)- येँया सिडिओ कार्यालयपाखें नेवाः नां दुगु व नेपाल संवत् तया हःगु संस्था दर्ता मयासे लित छ्वयाहःगु खँयात कयाः म्हिगः थीथी नेवाः खलः पुचःतय्सं येँया सिडीओ जितेन्द्र बस्नेतयात नापलानाः खँल्हाबल्हा ब्याकल ।

बागमती प्रदेशया पुलांम्ह मन्त्री शैलेन्द्र वज्राचार्यया नेतृत्वय् वंगु उगु पुचलं सिडिओ बस्नेतयात नापलानाः वंगु छुं ई न्ह्यः तिनि नेवाः नां तया हःगु व लोगोय् नेपाल संवत् नं च्वया हःगु संस्थायात दर्ता मयासे लित छ्वया खँय् जिज्ञासा तसें थथे छाय् जूगु धकाः न्ह्यसः तःगु खः ।

उगु इलय् सिडिओ बस्नेतं नेवाः नां व नेपाल संवत् उल्लेख दुगु संस्था दर्ता मयायेगु धइगु थःपिनि छुं नीति मदु धासें कर्मचारीपाखें गल्तीवस अथे जूवंगु जुइमाः धकाः कनादिल । लिसें वय्कलं संस्था दर्ता याइपिं सम्बन्धित कर्मचारीयात सःताः थथे छाय् जूगु धकाः न्यनेकने नं यानादीगु खः ।

नेपाल संवत्यात सरकारी ज्याखँय् नं छ्यलेगु धकाः नेपाल सरकारपाखें निर्णय यायेधुंकाः स्वयम् सिडिओ कार्यालयपाखें समेत थःपिनि लेटरहेडय् नेपाल संवत् छ्यलेगु यानाच्वनागु दु धासें सिडिओ बस्नेतं थुकिया बारे नं गनं समस्या दुगु खःसा उकियात समाधान याना वनेगु जुइ धयादिल ।

लिसें वय्कलं नेपालभाषां नां तया हःगु संस्था वल व उकी नेपाल संवत् छ्यलातल धाःसा अःपुक संस्था दर्ता याना बिउ धकाः नं कर्मचारीतय्त इनाप यानादिल । वय्कलं नेपाल सरकारं याःगु निर्णय पालना यायेगु सिडिओया कर्तव्य खः धासें आवंलि अथे समस्या मजुइगु खँ नं कनादिल ।

सिडिओ नापलायेत म्हिगः पूर्व मन्त्री वज्राचार्य लिसें नेवाः देय् दबूया नायः पवित्र वज्राचार्य, न्हूदँ समारोह समितिया नायः प्रा.डा. नरेशमान वज्राचार्य, भाषासेवी बिष्णु चित्रकार, भाषिक न्ह्यलुवा सुजिव वज्राचार्य आदिपिं झाःगु खः ।

बारम्बार थ्व समस्या छाय् ?
येँया सिडिओ कार्यालयपाखें नेवाः नां दुगु संस्था दर्ता मयायेगु थ्व ज्या आः जक मखु, थ्व स्वयां न्ह्यः नं तःक्वःमछि यायेधुंकूगु दु । सिडिओया कर्मचारीतय्सं नेवाः नां अनुवाद यानाः खस नेपाली भासं तयाहःसा जक संस्था दर्ता यायेगु जुइ धाःगुलिं गुलिखे संस्थातय्सं थःपिनि नां हे हिलाः नं संस्था दर्ता याना वंगु दु । गुलिं संस्थातय्सं धाःसा थ्व ज्याया विरोध यानाः च्वय्या निकायय् समेत गुनासो याःवंगुलिं उमिगु समस्या समाधान जूगु दु । अथे खःसां थ्व समस्या धाःसा हानं हानं लिसा कयाः दाहरे जुयाच्वंगु दु । कर्मचारी सूत्रं धाःकथं सिडिओ कार्यालययात नेपाली शब्दकोशय् दुगु शब्द बाहेक मेगु नां तया हल धाःसा अज्याःगु संस्था दर्ता यायेगु मखु धकाः निर्देशन हे बियातःगु दु । थुकिं यानाः कमर्चारी हिलेवं उगु निर्देशनया पालना यायेगु झ्वलय् थज्याःगु समस्या वःगु खः । आः नेपाल सरकारया सम्बन्धित निकाययात इनाप यानाः उगु निर्देशन हे खारेज याकेमाःगु सः थ्वया वःगु दु । अज्याःगु निर्देशन खारेज जूगु दु धकाः गृह मन्त्रालयं निर्णय यात धाःसा थ्व समस्या सदांया लागिं ज्यनीगु खँ धाःगु दु ।