कांग्रेस आः हे सरकारय् वनेमाः
येँ (नेपालभाषा टाइम्स)- कांग्रेस महामन्त्री गगन थापां संसदया बैठक न्ह्यः हे पार्टी सत्तापक्षय् च्वनेमाःगु खँ धयादीगु दु । म्हिगः उपराष्ट्रपति निर्वाचनय् मतदान लिपा सञ्चारकर्मीतलिसे खँ ल्हासें महामन्त्री थापां प्रधानमन्त्री पुष्पकमल दाहालं विश्वासया मत काये न्ह्यः हे सत्ता पक्षय् वनेगु कि मवनेगु धइगु निर्णय यायेमाःगु खँ धयादीगु खः ।
महामन्त्री थापां वइगु चैत ५ गते सःतूगु संसदया बैठक न्ह्यः हे कांग्रेसं सत्ता पक्षय् च्वनेगु, सरकारय् वनेगु व प्रधानमन्त्री दाहालयात विश्वासया मत बीगु निर्णय यायेमाःगु खँ धयादीगु खः । वइगु चैत ६ गते प्रधानमन्त्री दाहालं विश्वासया मत काइगु ज्याझ्वः दु । महामन्त्री थापाया कथं प्रधानमन्त्री दाहालं विश्वासया मत कायेधुनेवं सरकारं पूर्णता काइ ।
उकथं हे महामन्त्री थापां सरकार थःगु कार्यदिशाय् स्पष्ट जुइमाः धासें धयादिल, ‘वइगु न्यादँया नितिं थ्व सरकारं छु बी, छु खँय् हिउपाः हइ धइगु खँ ‘डे वान’ निसें हे न्ह्याः वनेमाः ।’
वय्कलं प्रधानमन्त्री व सरकारय् वनीपिं मन्त्रीतय्गु बारे नं स्पष्ट जुइमाःगु खँ धयादिल । छु मन्त्रालय कायेगु धइगु बारे थवंथवय् ल्वायेगु ज्या जुइ मजिउ धासें प्रधानमन्त्री दाहालं जनतायात छु बीगु धइगु खँय् नं स्पष्ट जुइमाःगु खँ नं धयादिल ।
सरकारं चैत्र १० गते पूर्णता काइगु
प्रधानमन्त्री पुष्पकमल दाहालं वइगु चैत १० गते सरकारं पूर्णता काइगु खँ धयादीगु दु । म्हिगः लगानी बोर्डया बैठक लिपा सञ्चारकर्मीतलिसे खँ ल्हासें प्रधानमन्त्री दाहालं थम्हं चैत ६ गते विश्वासया मत कायेगु व वयां स्वन्हु प्यन्हु लिपा सरकारं पूर्णता काइगु खँ धयादीगु खः । प्रधानमन्त्री दाहालं फुक्कं दलतलिसे सत्ता विस्तारया बारे सहलह यायेगु धासें सरकार विस्तारया नितिं गुगुं नं कथंया पंगः मदुगु खँ नं धयादीगु दु ।
LEAVE YOUR COMMENTS