भारतं लिपुलेकय् दयेकूगु लँपुया नेपाः सरकारपाखें आपत्ति

येँ – भारतं नेपाःया लिपुलेक जुयाः चीन व भारत स्वाइगु लँपु दयेकूगुलिं नेपाःया परराष्ट्र मन्त्रालयं आपत्ति प्वंकूगु दु ।

परराष्ट्र मन्त्रालयं शनिवाः छगू विज्ञप्ति पिथसें भारतया थज्याःगु ज्यां नेपाःयात दुःखित दयेकूगु न्ह्यथंसें उगु ज्या प्रति आपत्ति प्वंकूगु दु । विज्ञप्तिइ सुगौली सन्धी कथं लिम्पियाधुरा, कालापानी व लिपुलेक नापं काली खुसी पूर्वया क्षेत्र नेपाःया भूभाग धकाः प्रष्ट जूगु खँ धाःगु दु । थ्व खँ नेपाःयापाखें न्हापा व आः यानाः कयौं पटक धायेधुनागु खँ नं मन्त्रालयं विज्ञप्तिइ न्ह्यथनातःगु दु ।

प्रधानमन्त्री स्तर लगायत निगू देय् दथुइ जूगु समझदारी कथं सीमा विवादया समाधन वार्ता मार्फत मालेगु धकाः निर्णय जूगु धासें थ्व एकपक्षीय ज्या सम्झौताया अःख जूगु मन्त्रालयं न्ह्यथंगु दु । अथेहे मन्त्रालयं नेपाल सरकार निगू देय् दथुइया घनिष्ट एवं मित्रवत् स्वापुया माध्यमं ऐतिहासिक सन्धी, दस्तावेज, तथ्य व नक्शाया आधारय् सीमा सम्बन्धी मुद्दाया कूटनीतिक समाधान मालेत प्रतिबद्ध जूगु खँ धाःगु दु ।

शुक्रवाः भारतया रक्षामन्त्री राजनाथ सिंह भिडियो कन्फ्रेन्स मार्फत नेपाःया लिपुलेक जुयाः भारतया धार्चुला व चीनया कैलाश मानसरोवर स्वायेगु लँपुया उल्लेज्या यानादीगु खः । उगु ज्या लिपा नेपालय् उकीया विरोध जुयाच्वंगु दु ।