झिन्हु न्ह्यः दोलालघाटय् बेपत्ता जूम्ह आः तकं मलूनि

ख्वप – थौं स्वयां झिन्हु न्ह्यः बैशाख २ गते थः पासापिं नापं म्वः ल्हुइत दोलालघाटया दोभानय् धरंब्वाःवंम्ह ख्वपया २२ दँ दुम्ह श्रीजन दुवाल आः तकं बेपत्ता जुयाच्वंगु दु । श्रीजन नापं हे धरंब्वाःगु इलय् बेपत्ता जूम्ह दिनेश दुवालया सीम्ह धाःसा माझीतय्सं निन्हु लिपा लुइकूगु खः । ख्वपय् जात्रा चले जुयाच्वंगु हे इलय् मोटरसाइकलय् च्वनाः श्रीजन, पुजन, नविन व दिनेश यानाः प्यम्ह दुवाल पासापिं उखे वंगु खः ।

पुजन व श्रृजन सद्ये दाजुकिजा खः । उमि तःधिकःम्ह दाजु सुनिल दुवाल ख्वपं अन थ्यंक वनाः माः वनां नं लुइके मफुनि । बेपत्ता जुयाच्वंम्ह श्रीजन दुवालया अबु शक्ति दुवाल ‘गणेशं’ नेपालभाषा टाइम्सयात बियादीगु जानकारी कथं निपु खुसिया धारय् हे लानाः उपिं डुबे जूवंगु खः । थःपिंसं प्रहरी, सेना व सशस्त्रयात खबर यानाः माझीत मार्फत् मायेकागु झिन्हु दतं नं मनू धाःसा आः तकं मलूगु खँ वय्कलं कनादिल ।