ने. सं. ११४४ कौलाथ्व षष्ठी -

खानेपानी आयोगं लः वितरण सम्बन्धी धलः फ्वन

येँ – खानेपानी महसुल निर्धारण आयोगं काठमाडौं उपत्यका खानेपानी लिमिटेड (केयुकेएल) यात उपभोक्तायात लः वितरण यानाच्वंगु धलः (समय तालिका) पेश यायेत निर्देशन बिउगु दु । आयोगं वंगु शुक्रवाः केयुकेएलयात पौ हे च्वयाः सकलें उपभोक्तायात समानुपातिक रुपं तालिका दयेकाः लः वितरण यायेत धासें उकिया विवरण पेश यायेत निर्देशन बिउगु खः ।

आयोगं मूलपाइपाखें उपभोक्तायात वितरण याःगु लःया लाइन हिइकाः वितरण संजाल दयेकाः उकिया विवरण पेश यायेत निर्देशन बिउगु खः । आयोगया नियमावली – २०६४या दफा १७ (७)कथं केयुकेएल निर्देशन बिउगु खः । आयोगया अध्यक्ष उपेन्द्रकुमार अधिकारीं सकलें ग्राहकयात तालिकाया अनुशासन दुने हयेत व आयोगपाखें समयावधि खुले यानाः माग याःगु विवरण पेश यायेत केयुकेएलयात पत्राचार याःगु धलः प्राप्त मजूगु व आवंलि इलय् माग याःगु विवरण आयोगय् पेश यायेत धासें निर्देशन बियागु जानकारी बियादिल ।

वंगु छुं दिं न्ह्यः लःया मूलपाइपाखें हे उपभोक्तां थःथःगु छेँय् लः यंकाच्वंगु किपा सार्वजनिक जुइवं आयोगं थ्व सम्बन्धय् थःगु ध्यानाकर्षण जूगु खँ न्ह्यथंगु खः । वयां लिपा जेठ २० गते आयोगं स्वनिगलय् वितरणया निंतिं हयातगु त्वनेगु लःया मूलपाइपाखें वितरणया निंतिं यंकातःगु छेँया ग्राहकया नं. व बिल पेश यायेत केयुकेएलयात निर्देशन बिउगु खः ।

उगु इलय् आयोगं छवाःया दुने मूलपाइपं लः वितरण जुयाच्वंपिं सकलें ग्राहकया विवरण पेश यायेत धासें पत्राचार याःगु खः । तर केयुकेएलं आतकं उगु धलः आयोगय् पेश याःगु मदुनि । वि.सं. २०६५ साल थुखे बागमतिपाखें स्वनिगलय् लः वितरणया निंतिं मूलपाइपाखें वितरण याःगु लःया जानकारी जक केयुकेएलं आयोगयात बिउगु खः ।

वंगु जेठ १३ गते अवैधरुपं ड्रिल यानाः मूलपाइपपाखें लः यंकाच्वंगु किपा सार्वजनिक जूगु खः । उगु किपा सार्वजनिक जुइवं हे आयोगं केयुकेएलयात अवैध रुपं लः यंकाच्वंगु सम्बन्धय् न्यनेकनेया निंतिं केयुकेएलयात सःतूगु खः ।