मिसातय् निंतिं पत्रकारिता तालिम

येँ – मिसातय् क्षमता अभिवृद्धि यायेगु ल्याखं जूगु बाःछियंकंया मिसा पत्रकारिता तालिम क्वचाःगु दु ।दबू व येँ महानगरपालिकाया मंकाः ग्वसालय् जूगु तालिम समापन ज्याझ्वलय् मूपाहांकथं झायादीम्ह येँ महानगरपालिकाया उपप्रमुख हरिप्रभा खड्गी श्रेष्ठं तालिमया प्रशिक्षार्थीपिंत दसिपौ लःल्हानादीगु खः ।

दबूया नायः रश्मिला प्रजापतिया सभापतित्वय् जूगु तालिम समापन ज्याझ्वलय् मूपाहां श्रेष्ठं प्रशिक्षकपिंत मतिनाया चिं नं लःल्हानादीगु खः । ज्याझ्वलय् मूपाहां उपप्रमुख श्रेष्ठं तालिमं मिसातय् क्षमता अभिवृद्धि यायेत ग्वाहालि याइगु विश्वास प्वंकादीगु खः ।

तालिमय् सहभागि प्रशिक्षार्थीतय्सं जीवनय् मदयेक मगाःगु थुकथंया तालिमं आपालं खँ सयेके खंगुलिं मेमेगु थासय् नं थुकथंया तालिम न्ह्याका वनेमाःगु विचाः तयादीगु खः ।