नीलः सायमियात सुशासन पत्रकारिता पुरस्कार

येँ – येँ महानगरपालिकापाखें म्हिगः बसन्तपुली छगू ज्याझ्वःया दथुइ २७ क्वःगु महानगर दिवस न्यायेकल ।

ज्याझ्वलय् थीथी बाजं गुरुपिं, लानिपुखू पुनर्निर्माण ज्याय् ग्वाहालि यानादीपिं उपभोक्ता समितिया दुजःपिं, उत्कृष्ट योगदान यानादीपिं थीथी वडाया वडा अध्यक्षपिं, कर्मचारीपिंत हंगु खः । अथेहे नेपालभाषा टाइम्सया नीलः सायमि (राजेन्द्र मानन्धर) लिसें झिम्ह पत्रकारतय्त म्हतिं न्यय्द्वः दां सहित महानगर सुशासन पत्रकारिता पुरस्कार पाखें हनेगु ज्या जूगु खः ।

संघीय व्यवस्था तथा स्थानीय विकास मन्त्री राजेन्द्र श्रेष्ठ मू पाहां कथं झाःगु उगु ज्याझ्वः येँ महानगरपालिकाया मेयर विद्यासुन्दर शाक्यया सभापतित्वय् जूगु खः ।

ज्याझ्वलय् न्ववासें येँ मनपाया मेयर विद्यासुन्दर शाक्यं स्थानीय तहलय् थःपिं निर्वाचित जुयाः वयेधुंकाः येँ देय्या सांस्कृतिक पहिचान कायम जुइ कथंया आपालं ज्या यानागु खँ कनादिल । तत्कालीन येँ नगरपालिकायात महानगरय् रुपान्तरण यायेगु लागिं थः स्वयां न्ह्यःयापिं मेयरपिंसं नं आपालं ज्या याःगु स्मरण यानादिसें थःपिनि कार्यकालय् नं उकियात हे निरन्तरता बिसें अझ थप ज्याखँत जूगु खँ नं वय्कलं कनादिल ।

ज्याझ्वलय् विशेष पाहां बागमती प्रदेश सभाया सभामुख सानु श्रेष्ठ, बागमती प्रदेशया सांसद नारायण सिलवाल, नेपाल सरकारया मुख्य सचिव शंकरदास वैरागी, स्थानीय विकास मन्त्रालयया सचिव सुरेश अधिकारी लगायतया वक्तातय्सं नुगःखँ प्वंकादीगु खः ।

ज्याझ्वः क्वचायेकाः बसन्तपुली तुं सांस्कृतिक ज्याझ्वः नं जूगु खः । थ्व लसताय् बसन्तपुली कोलेस्टोरियल, रक्तचाप व सुगरया निःशुल्क जाँच यायेगु ज्या नं जुयाच्वंगु खः । लिसें अन हे कोरोना विरुद्धया खोप नं बियाच्वंगु खः ।

सम्बन्धित बुखँ

LEAVE YOUR COMMENTS