महानगरपालिकां प्रधानाध्यापक व स्रोत शिक्षक नियुक्ति याइगु
येँ (नेपालभाषा टाइम्स)÷येँ महानगरपालिकां प्रधानाध्यापक व स्रोत शिक्षक पदया लागिं दरखास्त आह्वान याःगु दु । महानगरं थीथी तहया समेत यानाः ७१ म्ह प्रधानाध्यापक व ११ म्ह स्रोत शिक्षक नियुक्तिया लागि दरखास्त आह्वान याःगु खः । महानगरपालिकाया शिक्षा अधिकारी सीताराम कोइरालाया कथं न्यादँया लागिं करारय् प्रधानाध्यापक छनोट यायेमाःगु जूगुलिं दरबन्दी मिलान तथा प्रधानाध्यापक नियुक्ति सम्बन्धी कार्यविधि, २०८० बमोजिम दरखास्त आह्वान याःगु खः ।
महानगरं आधारभूत तह (१–५ तगिं) या लागि खुम्ह, आधारभूत तह (१–८ तगिं) या लागिं २२ म्ह व माध्यमिक तहया लागिं ४३ म्ह प्रधानाध्यापकया लागि दरखास्त आह्वान याःगु खः । विद्यालय समायोजन वा थपघट जूसा संख्या थपघट जुइ फइगु खँ उल्लेख यानातःगु दु । मंसिर १ गतेतक इच्छुक उम्मेदवारतय्सं दरखास्त बी फइ । दरखास्त बीगु लागि सम्बन्धित तहलय् म्होतिं नं न्यादँ स्थायी सेवा अवधि जूम्ह जुइमाः ।
माध्यमिक तहया लागि २ हजार, आधारभूत (१–८) तहया लागि १ हजार ५०० व आधारभूत (१–५ तगिं) या लागि १ हजार परीक्षा शुल्क व महानगरपालिकाय् राजश्व बुझे यानागु भौचर संलग्न जुइमाःगु खँ धाःगु दु । महानगरं विद्यालय विकास प्रस्ताव तयारी व प्रस्तुतीकरणया लिधंसाय् प्रधानाध्यापक ल्ययेगु ज्या याइ ।
अथे हे येँ महानगरपालिकां स्रोत शिक्षकया लागि नं दरखास्त आह्वान याःगु दु । महानगरपालिकां महानगर– पालिकाया शैक्षिक नीति, योजना व कार्यक्रम प्रभावकारी रुपय् कार्यान्वयन यानाः विद्यार्थीया सिकाइ उपलब्धी अभिवृद्धि व गुणस्तर सुधारया लागिं विद्यालययात प्राविधिक ग्वाहालि यायेत स्रोत शिक्षकया आवश्यकता जूगुलिं ११ म्ह स्रोत शिक्षकया लागि दरखास्त आह्वान याःगु खः ।
महानगरपालिकां अंग्रेजी विषयया लागि २ म्ह, नेपाली विषयया लागि २ म्ह, गणित विषयया लागि ३ म्ह, सामाजिक विषयया लागिं २ म्ह व विज्ञान विषयया लागि २ म्ह स्रोत शिक्षकया लागि दरखास्त आह्वान याःगु दु ।
स्रोत शिक्षकया लागि १ मंसिर तक इच्छुक उम्मेदवारतय्सं दरखास्त बी फइ । स्रोत शिक्षकया लागिं लिखित, प्रयोगात्मक व अन्तर्वार्ता जुइसा परीक्षा शुल्क १ हजार तुइ । मंसिर १८ गते थुकिया जाँच जुइगु खँ नं मनपां धाःगु दु ।
LEAVE YOUR COMMENTS