काठमाडौं मलया पार्किङय् वनेथाय् पंक दयेकातःगु संरचना येँ महानगरं थुन
येँ (नेपालभाषा टाइम्स)÷ येँ महानगरपालिकां थनया तिंख्यः न्ह्यःने च्वंगु काठमाडौं मलया पार्किङ वनेथाय् दयेकातःगु अनधिकृत संरचना थुनाबिउगु दु । महानगरपालिकाया मेयर बालेन्द्र शाहया निर्देशन कथं डोजर हयाः संरचना थुंगु खः । संरचना थुनेगु निंतिं मेयर शाह थः हे काठमाडौं मल थ्यंगु खः ।
मलया पार्किङय् गाडी हे यंके मछिंक अनधिकृत रुपं संरचना दयेकाः पसः बालं बियातःगुलिं थुनाछ्वःगु खः । मेयर शाह थौंकन्हय् अन्डरग्राउण्ड पार्किङ दयेकेगु कथं नक्सा पास यानाः नं उगु थासय् पार्किङ मयाकुसे पसःक्वः पिकयातःथाय्या संरचना थुनाछ्वयेगु अभियानय् दु । थ्व हे अभियान कथं म्हीग वानेश्वरया थीथी व्यापारिक भवनया पार्किङ स्थलय् पिकयातःगु पसःक्वः थुनाछ्वःगु खः ।
काठमाडौं मल कर्मचारी सञ्चय कोषया स्वामित्वय् दुगु भवन खःसा थ्व भवन लिजय् कयातःपिंसं पार्किङ हे यायेमछिंक संरचना दयेकातःगु संरचना थुनाछ्वःगु खः ।
येँ महानगर दुने ततःधंगु व्यापारिक मल दयेकेबलय् पार्किङया व्यवस्था नं यायेमाः । तर नक्सा पास यायेबलय् पार्किङ धकाः थाय् क्यंसां लिपा पार्किङं स्वयां पसःक्वः पिकायेबलय् अप्वः ध्यबा वइगुलिं संचालकतय्सं पार्किङ यायेथाय् हे पसः कवः पिकयाः बालं बिइगु याना वयाच्वंगु खः ।
गुकिं यानाः उगु मलय् वइपिं ग्राहकतय्सं तकं पिने सतकय् पार्किङ यायेमाःगु बाध्यता जुयाच्वंगु दु । सतकय् पार्किङया कारणं ट्राफिक व्यवस्थापनय् हे समस्या वयाच्वंगुलिं येँ महानगरपालिकां पार्किङ दयेकेगु धकाः नक्सा पास यानातःगु भवनय् पार्किङ हे याकेत ३५ न्हुया सुचं पिकाःगु खःसा थ्व सुचं वास्ता मयासे पसः तयातःथाय् निरीक्षण यानाः ३६ औं न्हि कुन्हु निसें हे थुनेगु सुरु याःगु खः ।
LEAVE YOUR COMMENTS