आन्तरिक उडानया विमानस्थल दयेकेत निरीक्षण

येँ – त्रिभुवन अन्तर्राष्ट्रिय विमानस्थलं आन्तरिक उडानया विमानस्थल बिस्कं तयेगु निंतिं संस्कृति, पर्यटन व नागरिक उड्डयन मन्त्री रवीन्द्र अधिकारया पुचः काभ्रे वनाः निरीक्षण याःगु दु । काभ्रेया ठुलीचौर, चिसापानी ठुलीचौर वा नागीडाँडा मध्ये छगू थासय् विमानस्थल दयेकेगु पाय्छि जुइ कि मजुइ धइगु सुझाव कायेगु निंतिं मन्त्री अधिकारी अन वंगु खँ धाःगु दु ।

छगू जक अन्तर्राष्ट्रिय विमानस्थलय् विमानया चाप अप्वयाः आपालं जहाज आकाशय् तुं होल्ड यायेमाःगुलिं यानाः आन्तरिक उडान मेगु थासं यायेगु कथं थ्व निरीक्षण यायेगु ज्या याःगु खः । उगु थासय् विमानस्थल दयेकेगु पाय्छि जुइकि मजुइ धकाः अध्ययन यानाः सुझाव बीगु निंतिं प्यम्हेसिया विज्ञ पुचः दुथ्याःगु कमिटी दयेकूगु दु ।

उगु पुचलं झिंन्यान्हुया दुने ज्या न्ह्याकीगु खँ धाःगु दु । अन्तर्राष्ट्रिय विमानस्थलय् आन्तरिक विमानं ६५ प्रतिशत उडान अवतरण याइगु जूगुलिं यानाः आन्तरिक विमानस्थल मेथाय् दयेकेमाःगु खँ धाःगु दु ।