ने. सं. ११४३ तछलाथ्व दशमी -

मेलम्ची सुरुङया परीक्षण तयारी, परीक्षण सफल जुल धाःसा निला दुने स्वनिगलय् लः वइगु

येँ (नेपालभाषा टाइम्स) – मेलम्ची खानेपानी आयोजनया सुरुङया हाकनं परीक्षण यायेगु कथं तयारी सुरु जूगु दु । सुरुङया परीक्षण वइगु मंसिर दुने हे यायेगु कथं तयारी जुयाच्वंगु दु। वंगु असार महिनाय् न्हापांखुसी सुरुङ परीक्षण याःबलय् दुर्घटना जूगु खः । आः उकियात भिंकाः परीक्षण यायेगु तयारी जूगु खँ धाःगु दु ।

‘सुरुङय् दुगु त्रुटि भिंकेगु ज्या क्वचायेत्यंगु दु, उकिं आः हाकनं सुरुबय् लः छ्वयाः परीक्षण यायेगु तयारी जुयाच्वंगु दु’ खानेपानी मन्त्रालयया प्रवक्ता रितेश कुमार शाक्यं कनादीगु दु । वय्कलं बियादीगु जानकारी कथं मंसिरया निगुगू वालय् त्रुटि भिंकेगु ज्या क्वचाइगु खँ सुरुब दयेकाच्वंगु भारतीय कम्पनीं धाःगु दु। वय्कःया कथं सम्भावित फुक्कं थासय् पुनरावलोकन यायेगु ज्या जुइधुंकूगु दु ।

मंसिरं सुरुबय् लः छ्वया याइगु परीक्षण सफल जुल धाःसा नं येँय् लः हयेत धाःसा अझं निला ई काइतिनिगु खँ नं धयादीगु दु। मन्त्रालयं दयेकूगु कार्यविधि कथं म्हो परिमाणय् जक लः सुरुबय् छ्वयेगु कथं तयारी जुयाच्वंगु दु। सुरुङय् लः जायेधुंकाः छुं न्हिं ‘होल्ड’ यायेगु कथं योजना दयेकाः ज्या जुयाच्वंगु खँ नं वय्कलं कनादिल । वय्कलं धयादिल, ‘लः दुने जायेधुंकाः छुं न्हिं तयेबलय् गनं समस्या दु, मदु सीदइ, समस्या मन्त धाःसा जक हाकनं लः छ्वयेगु प्रक्रिया न्ह्याइ ।’

सुरुङया अवस्था पाय्छि जुल धाःसा सुन्दरीजलय् च्वंगु प्रशोधन केन्द्रय् लः वयेधुंकाः स्वनिगलय् लः इनेगु कथं तयारी जुयाच्वंगु दु। सुन्दरीजलय्लः प्रशोधन यायेगु निंतिं निगू प्रशोधन केन्द्र तयार जुइधुंकूगु दु । न्हापां परीक्षणया झ्वलय् वंगु असार २१ गते सुरुङय् लः छ्वःगु खःसा असार ३० गते दुर्घटना जूगु खः । सुरुङ परीक्षणया निंतिं लः जायेकूगु छवाः लिपा उगु दुर्घटना जूगु खः । थ्व दुर्घटनाया बारे अनुसन्धान यायेत खानेपानी मन्त्रालयया सहसचिव रमाकान्त दवाडीया संयोजकत्वय् अध्ययन समिति नीस्वनातःगु दु। समितिं सुरुबया गेट दुने तयेमाःथाय् पिने तःगुलिं दुर्घटना जूगु निष्कर्ष पिकाःगु खः । समितिया हे सुझावया आधारय् गेटया फ्रेम न्हू कथं दयेकूगु खः ।

सुरुङ दुर्घटनाय् लानाः कन्सल्ट्यान्ट दोर्जे पेम्बा व इन्जिनियर शेखर खनाल घाःपा जूगु खःसा इन्जिनीयर सतिश गोहित व सवारी चालक राधाकृष्ण थापामगर वेपत्ता जूगु खः । उपिं मध्ये इन्जिनीयर गोहित कन्हय् कुन्हु सिनाच्वंगु अवस्थाय् लुइकूगु खःसा चालक थापामगर धाःसा अझ नं बेपत्ता तिनि ।