मेयर्स फोरम बालेन खनाः तम्वल
येँ (नेपालभाषा टाइम्स)÷येँ मनपाया मेयर बालेन साहं स्वनिगःया फुक्क मेयरतय्सं नेपवेस्ट नांगु कम्पनीया ध्यबा नःगु धकाः बियादीगु द्वपंयात मेमेगु नगरपालिकाया मेयरतय्सं खण्डन याःगु दु । स्वनिगःया फोहोर व्यवस्थापन यायेगु जिम्मा नेपवेस्ट नांगु कम्पनीयात बीगु खँय् असन्तुष्टि प्वंकुसें मेयर साह वंगु सोमवाः कुन्हु भुइजःसिइ च्वंगु मेयर्स फोरमया बैठकं दथुइ हे दना वःगु खः ।
बैठकं दना वयेधुंकाः वय्कलं सामाजिक सञ्जालय् छगू स्टाटस च्वसें फुक्क मेयरतय्सं ध्यबा नयाः निर्णय याःगु व नेतातय्सं नेपाः मीधुंकल धकाः ब्वः बियादीगु खः । नेतातय्सं नेपाः मिउसां येँ देय् याकःचा जूसां धस्वानाः नेपाःया म्हसीका बियाच्वनी धकाः नं वय्कलं च्वयादीगु खः ।
वय्कःया थ्व धापूयात उगु बैठकय् सहभागी मेपिं मेयरतय्सं आलोचना याःगु दु । बुढानिलकण्ठ नगरपालिकाया मेयरं नं सामाजिक सञ्जालय् छगू स्टाटस च्वसें सकलें मेयरपिंत ध्यबा नःगु धकाः द्वपं बीगु धइगु मेयर साहया अराजक अवस्था खः धाःगु दु । वय्कःया थज्याःगु पहयात गबले तक सह यानाच्वनेगु धकाः नं वय्कलं न्ह्यसः तयादीगु दु ।
वकुन्हुया बैठकय् वय्कलं बैठकया मर्यादा तकं मतसे सभापतिं न्ववानाच्वंगु इलय् हे ‘जिं नि न्ववाये’ धकाः माइक काः वंगु व माइक मबीवं तमं दना वंगु खँ न्ह्यथँसें भुइजःसिया मेयरं बालेन साहया थ्व पहलं सामान्य मर्यादा तकं पालना मजूगु व वयां लिपा नं सकसितं ध्यबा नल धकाः द्वपं बीगु गलत खः धयादीगु दु ।
बैठकय् बालेन साह वनेधुंकाः नेपवेस्ट कम्पनीं थःगु प्रेजेन्टेशन न्ह्यब्वःगु व सकस्यां उकी थीथी न्ह्यसः तःगु खः । तर नेपवेस्टं उकिया लिसः बिउसां येँया फोहोर व्यवस्थापन यायेगु जिम्मा बीगु बारे धाःसा छुं निर्णय मजूगु खँ धाःगु दु ।
‘नेपवेस्ट’ या विवाद छु खः ?
नेपवेस्ट कम्पनी नगरया फोहोर व्यवस्थापन याइगु छगू निजी संस्था खः । थ्व संस्थां थीथी देय्या प्रविधि छ्यलाः स्वनिगःया फोहोर व्यवस्थापन यायेगु धकाः प्रस्ताव तयातःगु दु । नेपवेस्टया प्रस्तावयात येँ महानगरपालिका छगू बाहेक मेमेगु नगरपालिकातय्सं स्वीकृत याना तयेधुंकूगु दु ।
येँ महानगरपालिकाय् थ्व प्रस्ताव न्हापा विद्यासुन्दर शाक्य मेयर जुयाच्वंगु पालय् हे वयेधुंकूगु खःसां अबले पारित जुइ मफयाः थानाच्वंगु खः । आः येँय् न्हूम्ह मेयर वयेधुंकाः थ्व कम्पनीया प्रस्ताव झन् हे स्वीकृत जुइ मफुत । मेयर्स फोरमं नं नेपवेस्टयात ठेक्का मबीगु धकाः सहमति याना तयेधुंकूगु खः । तर सहमति जुइधुंकूसां नं हानं वहे कम्पनीया नां बैठकय् हल धकाः बालेन साह तम्वःगु खः ।
सूत्रतय्सं धाः कथं नेपवेस्टं फोहोरया व्यवस्थापन याइबलय् हरेक परिवारपाखें शुल्क कायेगु धकाः प्रस्ताव यानातःगु दु । थौंकन्हय् हरेक छेँखां जक शुल्क कायेगु यानाच्वंगु दु । नेपवेस्टयात ठेक्का बिल धाःसा छखा छेँ दुने ग्वःगू परिवार दु उपिं फुकस्यां शुल्क पुले मालीगु खँ धाःगु दु ।
LEAVE YOUR COMMENTS