नारायणहितिइ कारवाहीया पौ

येँ- नाराणयहिति दरवार संग्रहालयया बालं प्रकरणय् संग्रहालयया निवर्तमान कार्यकारी निर्देशक लगायत उगु काण्डय् ल्हाः दुपिंत सार्वजनिक सम्पदा विरुद्धया कसुरय् कारबाही यायेत संस्कृति, पर्यटन तथा नागरिक उड्डयन मन्त्रालयं प्रहरी प्रधान कार्यालययात पौ च्वःगु दु ।

मन्त्रालयया प्रवक्ता डा.टोकराज पाण्डेया कथं नारायणहिति दरवार संग्रहालय परिसरय् क्यान्टिन सञ्चालन सम्बन्धी अध्ययन लिसें छानविन समितिं बिउगु प्रतिवेदन सहित निवर्तमान कार्यकारी निर्देशक भेषनारायण दाहाल व बतास समूहया सञ्चालकतय्त मुलुकी अपराध संहिता २०७४ या दफा १४७ कथं कारबाही यायेत पौ छ्वःगु खः । थुगु संहिताकथं राष्ट्रिय लिसें सार्वजनिक सम्पदा पूर्वस्वीकृति मकासे अतिक्रमण, भोगचलन याये दइ मखु । थुगु कसुर प्रमाणित जुल धाःसा कसुर याःम्ह वा याकूम्हेसित स्वदँया कैद व स्वीद्वः तका जरिवाना वा निगुलिं सजाय जुइफु ।

मन्त्रालयं प्रहरीयात निवर्तमान कार्यकारी निर्देशक दाहालं सार्वजनिक सम्पत्तिया संरक्षण संवद्र्धन यायेमफुगुलिं कारबाहीया नितिं पौ च्वःगु खः । उगु पतिइ दाहालं सरकारं बिउगु जिम्मेवारी कुशलतापूर्वक निर्वाह यायेमफुगु, बी म्यानेजमेन्टं याःगु अतिक्रमण पने मफुगु खँ न्ह्यथनातःगु दु । उकथं हे मन्त्रालयं भ्रष्टाचारजन्य क्रियाकलाप जूगुलिं माःगु कारबाहीया नितिं अख्तियार दुरुपयोग अनुसन्धान आयोगयात नं पौ छ्वःगु दु ।

व्यापारी घराना बतास समूहलिसे मिले जुयाः क्याफे सञ्चालनया सम्झौता याःगु सहसचिवस्तरीय छानविनया झ्वलय् खने दयेवं मंगलवाः संग्रहालयया प्रमुख कार्यकारी निर्देशक भेषनारायण दाहालं पदं राजीनामा बिउगु दु । दाहालं थगुने नारायणहिति दरवार संग्रहालय लगायत गणतन्त्र स्मारक व्यवस्थापन तथा सञ्चालन विकास समिति दयेकाः आम्दानी अप्वयेकेत दरवार दुने रेष्टुरेन्ट तयेके बीगु निर्णय याःगु खः ।