ने. सं. ११४३ तछलाथ्व दशमी -

आसामया नेपाली मूल ‘अनागरिक’ जुइगु खतरा

येँ – भारत सरकारं हःगु नागरिकता वितरण सम्बन्धी छगू न्हूगु नियमं अनया आसाम राज्यय् बसोबास यानाच्वंपिं लखौं नेपाली मूलया भारतीयत नागरिकता कायेगुपाखें बञ्चित जुइमालीगु अवस्था वयाच्वंगु दु । थुकिं यानाः अनया नेपाली मूलया भारतीय नागरिकत अतिकं चिन्तित जुयाच्वंगु दु ।

आसामय् करिब २५ लाखम्ह नेपाली भाषी भारतीयत बसोबास यानाच्वंगु दु । उकी मध्ये छुं भचा ल्याः नेवाःतय्गु नं दु । भारत सरकारं हःगु न्हूगु नागरिकता सम्बन्धी कानूनं यानाः अन च्वनाच्वंपिं भारतीय नेवाःत तकं प्रभावित जुइ फइगु खँ धाःगु दु ।
भारत सरकारं हःगु न्हूगु नागरिकता सम्बन्धी नियम एनआरसीया कारणं आसामय् च्वनाच्वंपिं ४० लाखम्ह मनूत नागरिकतापाखें बञ्चित जुइगु अवस्था दु । थ्व ४० लाख दुने आपालं नेपाली मूलया नागरिकत नं दुथ्यानाच्वंगु दु ।

खास यानाः सन् १९७१ य् जूगु भारत–पाक युद्ध व बंगलादेशय् जूगु विद्रोहया झ्वलय् बंगलादेशं बिसिउँ वयाः आसामय् च्वनाच्वंपिं बंगालीतय्त देशं पितिना छ्वयेगु लागिं भारत सरकारं थ्व नियम हःगु खः । थ्व नियम कथं सन् १९७१ या मार्च २५ तारिख स्वयां न्ह्यवंनिसें भारतय् बसोबास यानाच्वंपिंत जक नागरिकता बीगु जुइ । उकिं थ्व मिति स्वयां न्ह्यः भारतय् च्वंच्वनागु खः धइगु भ्वं क्यनेफुपिंत जक नागरिकता बीगु नियम भारतं हःगु खः ।

तर आसामय् पुस्तौंपुस्तानिसें च्वनाच्वंगु खःसां आपालं नेपाली मूलया आपालं भारतीयतय्सं अज्याःगु भ्वं धाःसा क्यने फुगु मदुनि । उकिं उमित भारतं नागरिकता बीगु सम्भावना म्हो जूगु खः ।

पुस्तौं न्ह्यवंनिसें भारतय् च्वंच्वनागु खःसां मात्र भ्वं क्यने मफुगु कारणं थःपिंत ‘अनागरिक’ दयेकीन धासें भारतय् च्वंगु थीथी नेपाली भाषी संघ संस्थातय्सं राजधानी न्हूदिल्ली वनाः गृहमन्त्री राजनाथ सिंहयात नापलासें खँल्हाबल्हा याःगु दु । गृहमन्त्री सिंहं सुं नं भारतीय नागरिकयात नागरिकतां बञ्चित यायेगु ज्या जुइ मखु धकाः आश्वासन बियाहःगु खँ धाःगु दु । आसाम सरकारलिसे नं थुकिया बारे खँ जुयाच्वंगु दु ।