कोटेश्वर जडीबुटीया जाम चिइकेत पहल

येँ – येँ व ख्वप स्वाइगु थनया कोटेश्वर जडीबुटी लागाय् जुइगु सवारी जाम चिइकेत पहल शुरु जूगु दु । उगु लागाय् सवारी चाप अप्वयाः उगु लँपु जुयाः वयेवने यायेमाःपिंत समस्या जुइवं राहत बीकथं सवारी चाप चिइकेत पहल शुरु जूगु खः । थ्व झ्वलय् हनुमन्ते करिडोर क्षेत्रय् सतक कालोपत्र यायेगु ज्या शुरु जूगु दु । न्हापांगु चरणय् जडीबुटीनिसं आँखा अस्पताल जुयाः हनुमन्ते करिडोरतक सतक कालोपत्र याःगु खः ।

थुकथं हे करिब १२ करोड लागतय् हनुमन्ते व मनोहरा खुसि दोभाननिसें बालकुमारितक सतक निर्माणयात नं तीव्रता बीगु जूगु दु । थ्व हे झ्वलय् कोटेश्वर–जडीबुटी लागाय् न्हियान्हिथं जुइगु सवारी चापयात म्हो यायेत मनोहरा खुसिइ बेलिब्रिज तयेगु ज्या नं शुरु याःगु दु ।

बेलिब्रिज व करिडोर निर्माण लिपा कोटेश्वर जडीबुटी जुइगु सवारी जामया समस्यापाखें स्वनिगःवासी मुक्त जुइगु विश्वास कयातःगु दु । वइगु निदँया सवारी चाप म्हो यायेत न्ह्याथेंज्याःगु विकल्प प्रयोग यायेमाःसां तयार दुगु सडक डिभिजन ज्याकू ख्वपया महानिर्देशक रवीन्द्रनाथ श्रेष्ठं धयादिल ।