चिनियाँ राष्ट्रपतिं पुलांम्ह जुजु नापलायेगु इच्छा यानादीगु खः ?

येँ – लछि न्ह्यः नेपाः भ्रमणय् झाःम्ह चिनियाँ राष्ट्रपति सी चिनफिङं थःगु भ्रमणया झ्वलय् पुलांम्ह जुजु ज्ञानेन्द्र शाहयात नं नापलायेगु इच्छा प्वंकादीगु खँ सार्वजनिक जूगु दु ।‘देश सञ्चार’ अनलाइन खबरया सम्पादक लिसें वरिष्ठ पत्रकार युवराज घिमिरें थःगु अनलाइन मार्फत थ्व समाचार सार्वजनिक यानादीगु खः ।

राष्ट्रपति सीं नेपाः भ्रमणया झ्वलय् पुलांम्ह जुजु शाहयात नं नापलायेगु इच्छा प्वंकादीगु खःसां प्रधानमन्त्री केपी ओली लगायत सत्तारुढ दलया मेपिं पदाधिकारीतय्सं समेत सकारात्मक संकेत मबिउगुलिं सीं नापमलाःगु खँ समाचारय् न्ह्यथनातःगु दु ।

नेपाः वये न्ह्यः राष्ट्रपति सी भारतया भ्रमण यानाः झाःगु खः । भारतं नेपाः थ्यनेधुंकाः वय्कलं पुलांम्ह जुजुयात समेत नापलायेगु इच्छा प्वंकादीगुलिं भारतय् थीथी नेतात नापलायेगु झ्वलय् वय्कलं नेपाःया राजतन्त्र बारे समेत खँ ल्हानावःगु खः लाकि धइगु नं शंका पिहां वःगु दु ।

राष्ट्रपति सीं पुलांम्ह जुजुयात नापलाये चाहे जूगु कारणं नेपालय् स्थायी शान्ति पलिस्था यायेगु सवालय् चीनं अझ नं परम्परागत शक्तिकेन्द्रयात पत्याः यानाच्वंगु खनेदु धइगु टिप्पणी नं समाचारय् यानातःगु दु ।

राष्ट्रपति सीं पुलांम्ह जुजु नापलायेगु इच्छा यानादीगु खःसां नेपाःपाखें सकारात्मक संकेत मक्यनेवं राष्ट्रपति सीया दूतं धाःसा गोप्य रुपं पुलांम्ह जुजुयात नापलाःगु खँ नं समाचारय् च्वयातःगु दु । तर राष्ट्रपति सीया दूतं पुलांम्ह जुजु नापलाःगु खँयात धाःसा निर्मल निवास लगायत छुं नं आधिकारिक निकायं पुष्टि धाःसा मयाःगु खँ नं उकी न्ह्यथनातःगु दु ।