प्रदेशया स्वयां स्थानीय तहया बजेट अप्वइगु

येँ – संघीय नेपाःया न्हापांगु बजेटय् प्रदेशयात स्वयाः स्थानीय तहया बजेट अप्वइगु खँ धाःगु दु । राष्ट्रिय योजना आयोगया अधिकारीतय्सं प्रदेशया निंतिं मुक्कं बजेटय् १५ प्रतिशत फ्याइगु जूगु दुसा स्थानीय तहयात २१ प्रतिशत फ्याइगु जूगु दु । थ्व ल्याखं स्थानीय तहय् छ्वइगु बजेट मुक्कं बजेटया न्याब्वय् छब्व जूवइ ।

सरकारं बजेट दयेकीबलय् राष्ट्रिय योजना आयोगं दयेकूगु नीति व योजना कथं हे बजेट फ्यायेगु याइ । आयोगय् थौंकन्हय् बजेट सम्बन्धी सहलह जुयाच्वंगु दु । स्थानीय तहया बजेटय् अनुदान व राजश्व वापतया ध्यबा नं दुथ्याइगुलिं तःधं खनेदुगु खँ आयोगया दुजःपिंसं धाःगु दु ।

योजना आयोगया उपाध्यक्ष पुष्पराज कँडेलं समृद्धिया विकासया खँ स्थानीय तह तक थ्यंकेमाःगुलिं स्थानीय तहया बजेट अप्वयेत्यंगु खँ धयादीगु दु । वय्कलं बिबिसीलिसे खँ ल्हासें धयादीगु दु, ‘न्हूगु सरकारपाखें जनताया यक्व अपेक्षा दु । समृद्धि व विकासया ज्या स्थानयि तहपाखें यंकेमाः । उकिं स्थानीय तहया बजेट थ्यंमथ्यं २१ प्रतिशत थ्यनीगु खनेदु ।’

वइगु आर्थिक दँया बजेट १२ खर्बया जुइगु अनुमान जुयाच्वंगु दु । संविधान कथं संघीय सरकारया बजेट वइगु जेठ १५ गते पेश याइगु जुइ । गुलिखे जिल्लास्तरया ज्या, गथेकि शिक्षा, स्वास्थ्य, कृषि, पशुपालन लगायतया क्षेत्रया ज्या स्थानीय तहय् वनेधुंकूगु दु । उकिं थज्याःगु क्षेत्रय् वइगु अनुदानया तःधंगु ब्व स्थानीय तहय् वनीगु जूगुलिं नं स्थानीय तहया बजेट अप्वः खनेदुगु खँ आयोगया दुजः शरदचन्द्र पौडेलं धयादीगु दु ।

वय्कलं धयादीगु दु, ‘न्हूगु व्यवस्था कथं यक्व थेंज्याःगु स्थानीय तहय् सम्पादन जुइ । उकिया निंतिं फ्याइगु ध्यबा तप्यंक स्थानीय तहय् वनी । जिल्लाय् दुगु शिक्षा, स्वास्थ्य, पशु लगायतया शाखापाखें जुया वयाच्वंगु ज्याया ध्यबा स्थानीय तहय् वनीगु जुसेंलिं बजेट नं अप्वइगु स्वाभाविक खः ।’

थुगुसी न्हापांखुसी संघीय ढाँचा कथं संघ, प्रदेश व स्थानीय तहं नं थःथःगु बिस्कं बजेट हयेत्यंगु दु । संघीय सरकारं बजेट हयेधुंकाः सरकारं विनियोजन अनुदान बजेटया आधारय् प्रदेश व स्थानीय सरकारं थःपिनि बजेट दयेकाः न्ह्यब्वइ ।