त्रिचन्द्र क्याम्पसय् तोडफोड
येँ (नेपालभाषा टाइम्स)- स्वतन्त्र विद्यार्थी युनियन (स्ववियु) निर्वाचन प्रक्रिया न्ह्यःने मन्ह्याकूगु धासें म्हिगः त्रिचन्द्र क्याम्पसय् तोडफोड जूगु दु । विद्यार्थीतय् छगू पुचलं क्याम्पस प्रमुख, सहायक क्याम्पस प्रमुख व निर्वाचन अधिकृतया कार्यकक्षय् तोडफोड याःगु खः । तोडफोडलिपा टेबल व कुर्सी क्षति जूगु दु । विद्यार्थीतय्सं क्याम्पस दुने च्वंगु कुर्सी पिने लुखाय् हयाः नारावाजी नं याःगु खः ।
त्रिचन्द्र क्याम्पसय् विवादया कारणं वंगु पुस २६ गते मनोनयन दर्ता यायेगु ज्या जुइमफुगु खः । वयां लिपा मतदाता नामावली पिकायेगु निसें माःगु समन्वय मयाःगु धासें नेविसंघया विद्यार्थीत आक्रोशित जूगु खः । पिने गेटय् तयेहःगु कुर्सीइ ‘चुनाव याके मफुम्ह क्याम्पस प्रशासनं राजीनामा बिउ’, ‘निर्वाचन अधिकृत ग्वः ?’, ‘क्याम्पस प्रमुख तंगु दु’ धयागु नारा सहितया पोस्टर तिकाः विरोध प्वंकूगु खः । विद्यार्थी भर्नालगायतया विवादया कारणं त्रिचन्द्रय् स्ववियु निर्वाचन न्ह्यःने न्ह्याके फयाच्वंगु मदु ।
LEAVE YOUR COMMENTS