बञ्चरेडाँडाय् फोहोर वाके मबिल, भदौ १ निसें सदांया लागिं बन्द !

येँ (नेपालभाषा टाइम्स)÷येँया फोहोर तयाः वनाच्वंगु गाडीयात बञ्चरेडाँडाया स्थानीयवासीं म्हिगः हानं पना बिउगु दु । थ्व स्वयां न्ह्यः सिसडोलंनिसें बञ्चरेडाँडा तक वनेगु लँ दयेकेमाःगु धासें वंगु च्यान्हु न्ह्यवंनिसें स्वनिगलय् फोहोर मुना यंकेगु ज्या बन्द जुयाच्वंगु खः । च्यान्हु लिपा म्हिगः फोहोर तयाः वंगु गाडीयात नं स्थानीय जनतां लँय् हे पना बिउगु खः ।

लँ दयेकेगु ज्या पूमवंनिवं हे फोहोर वाये हःगु व फोहोर तया हःगु गाडीइ नं लिचड ट्यांकी तयेगु व्यवस्था मयाः धासें स्थानीयवासीं लँय् हे गाडी पना बिउगु खँ धाःगु दु । येँ मनपा वातावरण विभागया प्रमुख सरिता राईं ‘रासस’ यात कनादी कथं स्थानीयवासीं याःगु अवरोधं यानाः येँनं फोहोर क्वबियाः वंगु गाडी फुक्कं सिसडोलंनिसें बञ्चरेडाँडा थ्यंक हे झ्वःलिक थानाच्वंगु दु । च्यान्हु तक मयंकुसे तयातःगु फोहोर ज्वनाः म्हिगः ६० गः गाडी बञ्चरेडाँडापाखे वंगु खँ नं राईं कनादिल ।

लछि न्ह्यः तिनि स्थानीय जनतालिसे कामपां छगू सम्झौता यासें फोहोर तया हइगु गाडीइ हे लिचडया व्यवस्थापन जुइमाःगु, लँ दयेकेमाःगु, नवःगु चीकेमाःगु सहमति कायम याःगु खः । थौंकन्हय् स्वनिगलं जक न्हिं १२०० मेट्रिक टन फोहोर सिसडोलय् वायेगु यानाच्वंगु दु । उकी येँनं जक ५०० मेट्रिक टन फोहोर पिहां वइ ।
भदौ १ निसें सदांया लागिं बन्द !

बन्चरेडाँडा ल्यान्डफिलया स्थानीय जनतां थ्वहे वइगु भदौ १ गते निसें स्वनिगःया फोहोर बन्चरेडाँडाय् वायेके मबीगु घोषणा याःग दु । म्हिगः फोहोर मैला सरोकार समितिं म्हिगः पत्रकार सम्मेलन यासें थ्व जानकारी याःगु खः । पत्रकार सम्मेलनय् समितिया अध्यक्ष श्रीराम ढुंगानां मेयर बालेन्द्र साहं भदौनिसें येँया फोहोर थःपिंसं हे व्यवस्थापन याये धाःगु कारणं वय्कःया उगु हे योजनायात साकार यायेगु लागिं थःपिंसं भदौ १ गतेनिसे बन्चरेडाँडा बन्द यायेत्यनागु खँ कनादिल ।

उकथं हे अध्यक्ष ढुंगानां न्हापा जूगु सम्झौता कार्यान्वयन यायेगु सवालय् गुगुं नं कथं चिउताः मक्यंगु धासें आः थःपिं फोहोर पनेत बाध्य जूगु खँ कनादिल । खुलाया दुने प्रभावित क्षेत्रया भूमि अधिग्रहण यायेगु व प्राविधिक पुचलं मूल्यांकन यायेगु नितिं जनप्रतिनिधिसहितया पुचः तत्काल वनेगु धाःगु खःसां आः तक छुं मजूगु द्वपं नं वय्कलं बियादीगु दु ।

थ्वहे झ्वलय् येँ महानगरपालिकां फोहोर मैला व्यवस्थापन यायेत आधुनिक उद्योग चायेकेगु लागिं आर्थिक दँ २०७९÷८० या बजेटय् ६५ करोड फ्यायेगु निर्णय याःगु दु ।