३ नम्बर प्रदेशसभाया बैंठक थनिंनिसें

येँ – प्रदेश नं. ३ या प्रदेशसभाया बैठक थनिनिसें मकवानपुरया हेटौंडाय् च्वंगु क्षेत्रीय शिक्षा निर्देशनालयय् च्वनेत्यंगु दु । थौं १ बजेनिसें बैठक न्ह्याइगु खँ धाःगु दु । थौंया बैठकय् दकलय् ज्याथम्ह सांसद कथं कार्यबाहक सभामुख जुयादीम्ह डोरमणि पौडेलं प्रदेश प्रमुख अनुराधा कोइरालां सःतादीगु बैठकया पत्र, अन्तरिम कार्यविधिया प्रस्तावना व संवैधानिक रुपं सभामुखया निर्वाचनया तिथि क्वःछिइगु बारे प्रस्ताव न्ह्यब्वयाः सहलह याइगु खँ प्रदेश सचिवालयया सहसचिव डा. रोजनाथ पाण्डें कनादीगु दु ।

३ नंं प्रदेशसभाया मुक्कं ११० म्ह सदस्य दुजः दु । बैठकया निंतिं प्रदेशसभा सदस्यतय् लिसें सर्वसाधारण जनताया निंतिं ५० गू सिट व सञ्चारकर्मीया निंतिं २५ गू सिट छुटे यानातःगु दु । न्हापांगु बैठकं प्रदेशसभा सञ्चालन सम्बन्धी अन्तरिम नियमावली पारित यायेगु व सभामुख व उपसभामुखया निर्वाचनया ई क्वःछिइगु खँ धाःगु दु । थौं न्ह्याइगु बैठकया निंतिं फुक्कं धयाथें तयारी जुइधुंकूगु दु । न्हापांगु बैठकया प्रत्यक्ष प्रशारणया व्यवस्था यानातःगु दुसा बैठकया निंतिं म्हिगः हे सर्वदलीय बैठक च्वंगु खः । विशेष यानाः प्रत्यक्ष प्रशारण पिनेया जिल्लां वइपिं पत्रकारतय्गु निंतिं यानागु जानकारी नं संसद सचिवालयं बिउगु दु ।

मुख्यमन्त्रीइ न्याम्हेसिया दावी

येँ – थनिंनिसें शुरु जुइत्यंगु ३ नम्बर प्रदेशया मुख्यमन्त्रीया निंतिं एमालेया न्याम्हेस्यां दावी याःगु खँ सीदुगु दु । थनिनिसें शुरु जुइगु न्हापांगु प्रदेशसभा न्ह्यः न्याम्हेसिनं मुख्यमन्त्रीया दावी याःगु खः । येँ नं क्षेत्रं निर्वाचित जुयादीपिं अष्टलक्ष्मी शाक्य, केशव स्थापित व सानुकुमार श्रेष्ठं मुख्यमन्त्रीया दावी यानादीगु दु । अथेहे धादिङ निर्वाचित जुयादीम्ह राजेन्द्र पाण्डे व दोलखां निर्वाचित जुयादीम्ह पशुपति चौलागाईं नं मुख्यमन्त्रीया दावेदार खः ।

जनभावनायात कदर यायेगु खःसा अष्टलक्ष्मी शाक्ययात हे मुख्यमन्त्री दयेकेमाःगु खँय् एमालेया आपालं प्रदेशसभाया सांसद दुगु खँ धाःगु दु । प्रतिनिधिसभा व प्रदेशसभा निर्वाचन न्ह्यव हे अष्टलक्ष्मी शाक्ययात हे मुख्यमन्त्री दयेकेगु सर्तय् प्रतिनिधिसभा त्वःतकेबीकाः प्रदेशसभाय् हःगु खः ।
एमालें प्रदेशया मुख्यमन्त्री फयांफछि सहमतिं हे मालेगु, यदि सहमति जुइमफुत धाःसा संसदीय दलया निर्वाचन यानाः मुख्यमन्त्री ल्ययेगु खँ धायेधुंकूगु दु ।